LUCKY CAIN
UQHAKAMBISE abalaleli beGagasi FM, uMinenhle Dlamini ongumphathi walo msakazo kulandela ukuvela kwezindaba zokuqokwa kwawo emcimbini wokuklomelisa we-Urban Music Awards 2025. IGagasi eselike lahlomula ngezindondo ezahlukene kweminye imicimbi yokuklomelisa, lisaqhubeka nokukhombisa ukudlondlobala kwezokusakaza njengoba libalwa neminye yemisakazo ehamba phambili eNingizmu Afrika nakuba lizinze KwaZulu- Natal.
Umcimbi we-Urban Music Awards uklomelisa abaculi, abadidiyeli bezingoma bezinhlobo ezahlukene kanye nemisakazo edlala indima ukusabalalisa izinhlobo ezahlukene zomculo kanti kuba ngabantu abavotayo ukuze kukonyeliswe osuke enqobile. Ephawula ngokuqokwa kwalo msakazo uMinenhle, uthe bazizwa bekujabulele lokhu kanti banethemba lokuthi abalaleli balo msakazo bazokwenza izimanga ngokuthi babavotele ukuze bayithole le ndondo.
“Ukuqokwa kwethu kukhombisa ngokusobala ukuthi sisayibambile futhi nomsebenzi wethu esiwenzayo uyabonkala. Lokhu kuqokwa kukhombisa ukuzinikela kwethu ukuqinisekisa ukuthi siba yizwi nephimbo laseKZN namaphethelo,” kusho
uMinenhle onguMqondisi Jikelele walo msakazo. IGagasi ngonyaka owedlule liklonyeliswe ngendondo yeMost Prominent Regional Radio Station emcimbini weBehind The Scenes Awards. UMinenhle uphinde wahalalisela nokuqokwa komunye wabo uKhaya Mthethwa ongumsakazi walo iGagasi kodwa ophinde abe ngumculi we-gospel. Kulo mcimbi uKhaya uqokwe njengomculi ngaphansi komunxa weBest Gospel Act.
UMinenhle unxenxe abalaleli balo msakazo ukuba babavotele njengoba imininingwane yokuvota bezoyimemezela emsakazweni. UKhaya uveze ukuthi kuhlale kuyintokozo ukuqokwa emcimbini yokuklomelisa ngoba lokhu kusho ukuthi abantu bayawubona umsebenzi wakhe.
