INKANTOLO eNkulu yaseMpumalanga iyalele ukuba kumiswe ukukhokhelwa kwenkosikazi kalowo owayengu Sekela Mengameli wezwe, uMnu David Mabuza imali yefa engaphezu kuka-R40 million. Lokhu kwenzeke namuhla ngesikhathi iJaji elibambile uJohannes Roelofse, liyalele khona inkampani egcine lemali yempesheni kaMabuza ewu-R44,7 million i-Alexandra Forbes ukuba ikumise ukukhokhelwa kuka-Nkz Patience Mnisi, oyinkosikazi kaMabuza.
Lesi simangalo safakwa yindodakazi kaMabuza uNkz Tamara Silinda (24), owaveza ukuthi unina washada noMabuza ngokwesintu. Emaphepheni afakwa enkantolo uTamara waveza ukuthi ukubona kuyinto engafanele ukuthi imali kayise ikhokhelwe umuntu oyedwa, kushaywe izingane zikaMabuza ngesithende. Waveza ukuthi kule mali udinga uR127 990 wokukhokhela izifundo zakhe zobudokotela ngonyaka, kanye no-R40 000 wesondlo zinyanga zonke, ukuze akhokhele indawo yokuhlala, athenge ukudla, ezokuthutha uma eya enyuvesi kanye nezidingo zakhe zempilo.
Lesi senzo sikaTamara sesekwa nangamanye amalungu omndeni wakwaMabuza okubalwa kuwo udadewabo (kaMabuza) uNkz Zandile Mabuza owaveza ukuthi yena namanye amalungu omndeni akholwa wukuthi izingane zikaMabuza kumele zihlomule nazo efeni likayise. Kuyo lenkantolo kuphinde kwavela ukuthi nakuba igama lika Nkz Mnisi liveza njengozokwengamela lelifa kodwa uMabuza wayesezinhlelweni zokukushintsha lokho ngaphambi kokushona kwakhe. Ijaji liveze ukuthi linquma ukukumisa ukuba yonke imali ikhokhelwa uNkz Mnisi ukuze igcineke iphephile. Linxuse umndeni ukuba ulungise izinkinga zawo.
“Ngiyacela nasemndenini wakwaMabuza ukuthi nizame ukuyilungisa ngaphandle le nkinga. Yebo amacala aloluhlobo ayangena ezinkantolo kodwa isiphetho sawo kuba yisilonda sangunaphakade kwabanye njengoba inkantolo ivuna uhlangothi olulodwa olusuke lunobufakazi obuqinile,” lisho.
