INKOSI yesizwe saKwaNxamalala, eMpendle, uSimphiwe Eric Zuma, itshele iNkantolo yeMantshi eHowick ngoLwesihlanu ukuthi abaphenyi becala layo, bayishaya kanzima ejele laseWestville, ngoLwesine olwedlule ebusuku, lapho igqunywe khona.
INkosi uZuma izovela futhi ngoMsombuluko mhla ka-1 kuMandulo (September) khona kule nkantolo, iyofaka isicelo sebheyili. Ibhekene necala lokuba yingxenye yetulo lokubulala ikhansela leDA, elalingusotswebhu omkhulu kuMasipala waseMngeni, uMnu Nhlalayenza Ndlovu.
UNdlovu ongumshana wayo iNkosi uZuma, wadutshulwa ngoZibandlela (December) ngo-2023, esemzini wakhe eMpophomeni, kubuka umkakhe nezingane. Inkosi iboshwe ngomhla ka-30 kuNtulikazi (July) ngecala lokwakha itulo lokubulala uNdlovu, okuthiwa balenza ejele iNew Prison, eMgungundlovu.
Ibekwe icala noKhayelihle Shabalala, uThabo Chonco, uThabani Hlongwa, kanti induna yaseMpophomeni, uMnu Zwelithini Buthelezi, isiphenduke ufakazi wombuso kuleli cala.
Imantshi itshele iNkosi uZuma ukuthi ingalivula icala lokushaywa. Inkosi iboshelwa elokubulala uNdlovu nje, ibingaphandle ngebheyili ka-R25 000, ngokubulawa kukandunankulu wesizwe, uMnu Qalokunye Zuma, owadutshuwa ngomhlaka 9 kuMasingana (January) ngo-2023.
Ibheyili yenkosi kuthiwa yafika nomunye usopolitiki owaziwayo esifundazweni. Amalungu emindeni, owakwaZuma nowakwaNdlovu, athi ashaqekile ngokuboshwa kwenkosi. Athi ibikhala “izinyembezi zengwenya”, izenza ezwelana nabo, ngokubulawa kwabo.
Icala lokubulawa kwenduna uZuma selisusiwe eNkantolo yaseMpendle, seliyoqulwa eNkantolo yaseHowick.
