USETSHELE isizwe, uMengameli Cyril Ramaphosa, ukuthi bakhathazekile ngesinqumo sikahulumeni wase-United States, sokumisa uxhaso lwezempilo, neNingizimu Afrika ebihlomula kulo.
URamaphosa uthi uyabakhathaza umthelela lesi sinqumo esithathwe nguMnu Donald Trump onguMengameli omusha wase-United States, okungenzeka sibe nawo ezinhlelweni obelulekelela kuzo.
Kusukela ezinsukwini ezedlule, isematheni indaba yalolu xhaso olulekelela kakhulu ezinhlelweni zokulwa neHIV kanye neTB, kanti sekuneminyaka i-US iluhlinzeka emazweni amaningi okubalwa kuwo nayo iNingizimu Afrika.
Ekhuluma kwiState of the Nation Address, eCape Town, ngoLwesine kusihlwa, uRamaphosa uthe lolu xhaso lwase-United States belulekelela ngengxenye ewu-17% wemali esetshenziswa ezinhlelweni zeNingizimu Afrika zokulwa neHIV.
Njengamanje kunetwetwe kubantu abaningi ngokuthi kungenzeka bazoshodelwe yimishanguzo yeHIV emitholampilo eyenganyelwe yizinhlangano ezingenzi-nzuzo, ebezithembele kulolu xhaso.
URamaphosa uthembise ukuthi bamatasa babheka izindlela ezahlukene zokubhekana ngokushesha nalesi simo esikhona njengamanje, nokuqinisekisa ukuqhubeka kosizo olusemqoka obelutholwa ngabantu ngalolu xhaso.
