UQOPHE umlando Louis Massyn eba ngumsubathi wokuqala ukugijima iComrades Marathon amahlandla awu-50. Weqe intambo ngesikhathi esiwu-11:53:14, kulo mjaho obuyizolo, osukele eMgungundlovu wasongwa eThekwini.
UMassyn kuthiwa uqale ukuba yingxenye yalo mjaho ngo-1973 kanti iminyaka angakwaza ukuyigijima ngayo yingesikhathi kupheduke iCovid-19.
Lo msubathi, oneminyaka ewu-74, uthi umjaho walo nyaka ubunzima kakhulu.
“Ngijabule kakhulu ngokukwazi ukuqeda umjaho wami ka-50. Ngeke ngiqambe amanga, bekunzima. Ngibonga kakhulu ukwesekwa ebengikuthola emgwaqweni. Abantu bangigqugquzela, banginike omkhulu umdlandla,” kusho uMassyn obechichima injabulo.
Umjaho walo nyaka unqontshwe nguGerda Steyn noTete Dijana (kwabesifazane), bakhala bemuka no-R874 000 ngokwehlukana kobulili, kwathi uJenet Mbhele noBongumusa Mthembu abathole amagolide kulo mjaho, bahlomula ngo-R60 000 ngaphezulu ophuma kuMnyango wezeMidlalo KwaZulu-Natal, oholwa nguMntomuhle Khawula.
