KUHLONYISWE izintombi nto ngolwazi ngesikhathi kunembizo yazo kulandela ukunukubezwa kwenye yazo ngenyaga eyedlule ngumelaphi wendabuko obeyelapha. Kulo mcimbi obuKwaMpumuza, eMgungundlovu ngoMgqibelo bekumenywe izinhlaka ezahlukene okubalwa amaphoyisa, abezempilo, abelaphi bendabuko kanjalo noNomehlo.
UMnu Sphesihle Khumalo onguNobhala kwiNhlangano yaBelaphi beNdabuko eKZN, ukhale ngabelaphi bendabuko abengenabo ubuntu. “Kubuhlungu ukuthi sihlangene ngomunye wozakwethu odicilela phansi umsebenzi, owenze isihluku sokudlwengula ingane abeyelapha. Sifisa ukwelula isandla ezintombini ngenhloso yokubonga ukuziphatha kahle, kusukela manje siyazinikela ekukhokheleni imigonqo yazo (camps) nakusizeni ngemali yokugibela nasekufakeni isandla kwezemfundo,” esho.
UNkk Anti Ngipheni Ngcobo (73) oyintombi nto, odabuka KwaMafunza, Mgungundlovu ozishaya isifuba ngokuthi useyintombi nto futhi uhlolwa nyanga zonke ubeyingxenye yalo mcimbi naye. Uncome ukusukumela phezulu lolu daba, wenxusa ukuba izintombi nto zivikelwe.
“Izintombi nto yizo ezongengcwaba mhla ngidlula emhlabeni, ngiyazithanda futhi ngiyazehlonipha ngokuziphatha kahle. Intombi, kufanele iziphathe kahle ukuze kungathiwa imithi njengenja, kungathiwa izele njengenja. Ngakho-ke zintombi ziphatheni kahle,”esho.
UNdlunkulu seSizwe saKwaMpumuza, uNkk Mbaliyomusa Zondi uncome inhlangano yabesifazane iZamokuhle Women’s Program ngokuba nesandla ekusizeni isisulu nasekutholeni obenukubeza.
“Kubuhlungu okwenzeke enganeni nobulwane kubantu besilisa ikakhulu umuntu othenjwayo emphakathini ongumelaphi wendabuko. Ingane ilimele emqondweni ngokuyehlele, kufana nokuthi ife iphila, emzimbeni nekusasa layo. Kuyichilo esikuzwe kule ndawo ukuthi umelaphi adlwengule isiguli, sifisa ukunxenxa amadoda abe yingxenye yokulwa nalesi sihlava. Sinxusa isizwe sonke samaMpumuza ukuba sisukume sivikele ukuhlukumezeka kwabesifazane, nabo abesifazane sifisa basondele emaphoyiseni nakwezempilo babike. Namuhla sizolwela odadewethu abangakwazi ukuzilwela, sethembisa ukusiza ngayo yonke indlela siwubukhosi bakwaMpumuza ukulwa nalesi sihlava,” kuphetha yena.
