KUKLONYELISWE nMnu Ndabezinhle Sibiya, onguMkhulumeli woMnyango wezokuThutha, KwaZulu-Natal, ngokusungula ikhasi leFacebook, elingundaba-mlonyeni, emcimbini obuseNkosi Albert Luthuli International Convention Centre (ICC), ngoLwesibili ebusuku, lapho bekuklonyeliswa amaphoyisa omgwaqo esasefundazweni.
UNgqongqoshe walo mnyango, eKZN, uMnu Siboniso Duma, uthe selokhu kuqiniswe umkhankaso wokubopha abantu abashayela bephuzile, zehlile izingozi emigwaqeni yesifundazwe. Ikhasi elisungulwe nguSibiya, kuthiwa selihehe abalandeli ababalelwa ku-350 000. Leli khasi, abantu bayalilandela kakhulu, ngisho nangabantu bakwezinye izifundazwe, ngoba kuvela izinto ezishaqisayo ezenzeka emigwaqeni.
Kuleli khasi kudalulwa abantu abaphezulu, nabenza imisebenzi ebalulekile emphakathini, ababoshelwa ukushayela bephuzile. Kugxilwa kakhulu emsebenzini lowo muntu oboshelwa ukushayela ephuzile, awenzayo, okubalwa kubo amaphoyisa, izimantshi, odokotela, abacwaningi-mabhuku, othisha, abafundisa emanyuvesi, amakhansela, nabashayeli abancane ngeminyaka, ababanjwa bebunklunklile.
Olunye udaba oluphume kulo lelikhasi, elisungulwe nguSibiya, lwaheha abantu, ngelomshado okuthi usanda kubuntsha eNewcastle, ngoba indanana ebizoshadelwa noyise, baboshelwe ukushayela bedakiwe. Umshado kuthiwa kwakufanele ube ngo-11 ekuseni, bona baboshwa entathakusa. Kudalulwe kulona leli khasi, ukuthi ngalobo busuku, nasentathakusa yakhona, kuboshwe abantu abangu-45, eNewcastle, ngokushayela bedle amanzi amponjwana.
USibiya, odabuka KwaSanguye, eMthonjaneni, usewuqweqwe emkhakheni wezokuxhumana nokwazisa, ngoba waqala enguMxhumanisi wesibhedlela iKing Edward VIII (osekuyiVictoria Mxenge manje), nomphakathi. Usesebenze eminyangweni eyahlukene kahulumeni wesifundazwe, owezeMpilo, owezeMali, wasebenza noDkt Zweli Mkhize, ezingeni likazwelonke.
