THANDOLUHLE NGUBO
UMNYANGO wezokuBuyiyswa koMhlaba nokuThuthukiswa kweziNdawo zaseMakhaya uthi iningi labantu eseziphumelele izicelo zabo, likhetha ukunikwa imali kunokuba libuyiselwe umhlaba.
Lokhu kuvele embikweni wakamuva walo mnyango, obuye wacaciswa nguNgqongqoshe wawo, uMnu Mzwanele Nyhontso. UNyhontso uthi zilinganiselwa ngaphezulu kuka-80 000 izicelo zokubuyiselwa umhlaba esezitholwe wumnyango kusukela ngo-1998.
Kulezi zicelo, balinganiselwa ku-8 300 okuthiwa baqoke ukuthatha umhlaba, kwathi abangaphezu kuka-50 000 bakhetha ukukhokhelwa imali. Izicelo eziwu-9000 kuthiwa zosacutshungulwa.
Ungqongqoshe ukhale nangokuthi abalimi abamhlophe bayenyusa kakhulu intengo yomhlaba uma uhulumeni efuna okuyithenga, okuyikho okugcina kubambezela uhlelo lokubuyiswa kwemihlaba.
Uthe uhulumeni sewusebenzise imali engaphezu kuka-R58 million kulolu hlelo, uthenga imihlaba, ukhokhela nalabo abadinga ukunxeshezelwa.
