INKUNDLA yezemidlalo iMoses Mabhida Stadium isikulungele ukumumatha izinkumbi zabalandeli bebhola likanobhutshuzwayo ngoMgqibelo njengoba kuzobe kunomdlalo wamanqamu weNedbank Cup, phakathi kwezingqungqulu zaseSoweto iKaizer Chiefs ne-Orlando Pirates.
Lokhu kuvezwe isikhulu sikaMasipala weTheku esibhekelela ukusetshenziswa kwale nkundla, uDkt Vusi Mazibuko othe konke sekumi ngomumo ngokusingathwa kwalo mdlalo okulindeleke ukuba uhanjelwe yizinkumbi zabalandeli ababalelwa ku-56 000.
UDkt Mazibuko uthe selukhona uhlelo oluhlangisa zonke izinhlaka zezokuphepha ngaphakathi enkundleni nangaphandle kwayo, amasango azovulwa ngo-11:30 ekuseni, umdlalo uzoqala seligamenxe elesithathu. Uthe okuhle ngale nkundla wukuthi ayiqali ukusingatha imidlalo yalolu hlobo nephakathi kwala maqembu amakhulu eNingizimu Afrika. “IMoses Mabhida Stadium iyaziwa ngokusingatha imidlalo emikhulu kuleli futhi esezingeni yomhlaba nethuthukisa umnotho weTheku,” kusho uDkt Mazibuko.
Uthi le nkundla kuyona yonke imidlalo emikhulu eke yayisingatha ayikaze ihlangabezane nezingqinamba. “Okuhle ngale nkundla wukuthi njengoba kuqhubeka ukulungiswa kwayo akuyiphazamisi imicimbi eqhubekayo kuyona,” esho. IMeya kamasipala weTheku, uMnu Cyril Xaba uthe imidlalo yalolu hlobo ivamise ukuba nomthelela omuhle kwezomnotho waleli dolobha kanti unesiqiniseko sokuthi nalona uzoba impumelelo. UXaba unxuse abantu bahloniphe imithetho ebekiwe, baqinisekise ukuthi amathikithi abanawo ngasemthethweni, athengweni ezindaweni ezivumelekile.
UMnu Brett Tangay omele inhlangano yezindawo zokudlela nezokulala iFederated Hospitality Association of South Africa (FEDHASA) uthe, nakuba engakawutholi umbiko ogcwele ngezindawo zokulala eziseThekwini nezigudle ulwandle kodwa uthe nakanjani zizobe zigcwele izivakashi. Uthe ezokuvakasha ezihambisana nemicimbi zivamise ukwenza kahle njengoba umlando wemidlalo yalolu hlobo uyakuveza ukuthi baningi abantu abazobe befudukele eThekwii. “Silindele impelasonto enhle kakhulu ezindaweni zokulala namahhotela ikakhulukazi aseThekwini nalawo agudle ulwandle,” esho.
Ngakolunye uhlangothi uMkhuzi wamaPhoyisa KwaZulu-Natal uLt Gen Nhlanhla Mkhwanazi, ukhiphe isexwayiso esimqoka kubathandi bebhola abazobe bephume ngobuningi babo kule mpelasonto. Uthe abakwaSdlodlo bazobe bephume ngezinkani ukuqinisekisa ukuphepha kwabantu kule mpelasonto nasenkundleni yezemidlalo. Uxwayise labo abazimisele ukuphambana nomthetho ukuba bangazami ngoba bazohlangana nembila zithutha, ziholwa ngemhlophe phambili.
