LUCKY CAIN
IDUMELE iMeya yaseMpofana, uNkk Thembi Magubane (osesithombeni), ngokubuyela kukamasipala wayo ngaphansi kwesandla somlawuli ngenxa yokubhukuda ezikweletini.
ILANGA lithole ukuthi lo masipala – owafakwa ngaphansi komlawuli kusukela ngo-2017 – kuwuphindile lokho ngenyanga edlule. Kuvela ukuthi ukweleta i-Eskom imali engaphezulu kuka-R500 million. Leli phephandaba lithole ukuthi sisesibi isimo semali yalo masipala, okungesinye sezizathu eziholele ekutheni uqhubeke nokuba ngaphansi komlawuli.
UNkk Magubane uthe nakuba bathathe izintambo lo masipala uvele ungaphansi komlawuli, bebezibophezele ngokukuguqula lokho ukuze ukwazi ukuzimela. “Esakuthola ngesikhathi sithatha umasipala, wukuthi wafakwa ngaphansi komlawuli ngenxa yokugxambukela kosopolitiki nokungabekezelelani. Nebala sangena sazama ukuguqula isimo, sakwazi ukubambisana namaqembu esibambisene nawo,” kusho uNkk Magubane.
“Sikwenzile konke obekumele sikwenze futhi saqinisekisa ukuthi siyazamukela neziyalo zokuphatha umasipala ebesizithola kubalawuli abahlukene,” kusho yena.
Uqhube ngokuthi bebenethemba lokuthi kuzophela lo nyaka sebeziphathele umasipala ngokugcwele. “Kusidumazile ukuzwa ukuthi siyabuyiselwa. kodwa-ke sakuqonda ukuthi okwenziwayo kuwukusiza thina nabantu esibasebenzelayo. Abasiyale ngakho kulokhu, wukuthi kumele siqinisekise ukuthi imali siyiqoqa ngendlela efanele ukuze sikwazi ukumelana nezidingo nezikweletu zethu,” kusho imeya.
Iqhube ngokuthi okunye abachazelwe ngakho, yisikweletu esimba eqolo sase-Eskom. “Okuhle wukuthi sesiyibhalelile i-Eskom, senza isivumelwano nawo, ngakho sinethemba lokuthi sekungokokugcina manje singaphansi komlawuli,” kusho uNkk Magubane. Babalelwa ku-4 abalawuli asebeke balawula lo masipala kusukela ngo-2017. Â
