AMAPHOYISA aphenya icala lokushushunjiswa kwabantu ngemuva kokuba kweqe abantu ababalelwa ku-50 abavela kwamanye amazwe emzini oseLombardy East Egoli.
Kubikwa ukuthi laba abebegcinwe ngaphandle kwemvume yabo namuhla ngoLwesithathu bakwazile ukubaleka kule ndawo. Kusolwa ukuthi bakuleli ngokungemthetho.
Abazibonele, abangomakhelwane kule ndawo batshele abezindaba ukuthi bezwe umsindo, maqede babona abantu beqa uthango walo muzi, bebaleka, abanye babo behlubule.
Kuthiwa amaphoyisa akwazile ukubamba abanye balaba bantu, bayiswa esiteshini samaphoyisa eSandringham.
Kusolwa ukuthi abaningi balaba bantu ngabomdabu wase-Ethiopia noma eSomalia.
