AMAQEMBU aphikisayo ePhalamende likazwelonke iBuild One South Africa ne-Economic Freedom Fighters afuna uNgqongqoshe wezoHwebo nokuNcintisana uMnu Parks Tau awacacisele ngokuqokwa kwenkampani iSizekhaya Holdings ukuba yengamele i-Lotto yaseNingizimu Afrika. NgoLwesithathu ungqongqoshe umemezele le nkampani njengozosingatha izizumbulu ze-Lotto kule minyaka ewu-8 ezayo.
La maqembu asola ukuthi ungqongqoshe ube nokwenzelela ngokuqoka le nkampani engaphansi kwenkampani iGold Rush enoMnu Sandile Zungu noMnu Moses Tembe njengabanye babaphathi bayo. UNkz Nobunu Hlazo-Webster oyiPhini lomholi weBosa uthe ufuna ungqongqoshe athule umbiko ogcwele ePhalamende, ozochaza kabanzi ngemigudu elandeliwe nangendlela obekuthola ngayo amaphuzu okuqokwa kwale nkampani. Ngakolunye uhlangothi i-EFF iveze ukuthi igxeka ungqongqoshe ngenkohlakalo ngokuqokwa kwale nkampani. Leli qembu likhala ngokuthi ungqongqoshe uqhubekile nokumemezela le nkampani nakuba exwayisiwe ngale nkampani njengoba liveze ukuthi iphethwe ngabantu abanobudlelwano neqembu i-ANC.
“UMnu Sandile Zungu wayegaqele isikhundla sokuhola i-ANC futhi unobudlelwano noMnu Jacob Zuma ongumholi we-MK Party kanjalo noMnu Moses Tembe naye unobudlelwano ne-ANC,” kusho uMnu Sinawo Thambo okhulumela i-EFF. I-EFF isola ukuthi ukuzisthwa kwalesi sixwayiso ungqongqoshe kusho ngokusobala uthi uzimisele ngokuqhuba inkohlakalo ngaphansi kwegama leNational Lotto.
“UNgqongqoshe bekumele aqinisekise ukuthi lolu hlelo lwenzeka ngendlela engakhethi bala futhi evulelekile ukuze abantu bathembele kuyona,” kusho uThambo ngokuqokwa kwale nkampani egixabezwe inkontileka ka-R180 billion. Khona manjalo ungqongqoshe ugcine ememezela le nkampani elandela isinqumo seNkantolo eNkulu yaseNorth Gauteng enqume ukuthi kumele kuphele usuku lwangoLwesithathu mhlaka-28 kuNhlaba (May) 2025 eseyimemezelile inkampani ezothatha izintambo kwiThuba Holdings ephelelwa yinkontileka ngomhla ka-31 kwephezulu.
Isitatimende somnyango siqinisekisile ukuqashwa kwale nkampani egixabezwe ngale nkontileka yezigidigidi zamarandi. Kuzokhumbuleka ukuthi ungqongqoshe uke waphakamisa ukuthi uzoqoka inkampani ezobamba isikhashana isikhathi esingangonyaka kuze kube kuqokwa inkampani ngokugcwele. Lesi siphakamiso kasehlanga kahle kwenye yezinkampani ebifake isicelo sokwengamela i-Lotto yabe isibabela eNkantolo eNkulu yaseNorth Gauteng.
Isinqumo sale nkantolo yisona esinqumele ungqongqoshe usuku lwangoLwesithathu njengolomnqamulajuqu. Nakuba kulindeleke ukuba le nkampani iqale ngomhla ka-1 kuNhlangulana (June) kodwa akucaci ukuthi kuzoshaya lolu suku isikulungele ukuqala ukusebenza. Imizamo yokuthola uZungu iphunzile njengoba ucingo lwakhe belukhala lingabanjwa kanti nemibuzo athunyelelwe ngo-whatsapp kuze kwashaya isikhathi sokushicilela engakayiphenduli. Kubikwa ukuthi iSizekhaya isebenzisana nenkampani eyengamele iLotto yaseChina iGlenlot esingethe izinkampani ezinkulu ze-Lotto emhlabeni.
