USALE edumele wasola ipolitiki nemizamo yokumvala umlomo uMnu Julius Malema enqatshelwa ukuthola iVisa yokulibangisa eLondon e-England ukuyoba ingxenye yengqungquthela ebizwa ngeCambridge Conference.
UMalema ongumholi we-Economic Freedom Fighters bekumele alifulathele ngoLwesithathu elakuleli elibangisa phesheya kodwa wathola ngomzuzu wokugcina ukuthi ngeshwa akayitholanga imvume yokungena eNgilandi.
Lo mholi owaziwa ngokuzikhulumela nokungancethezi ubabele enkundleni yakhe yokuxhumana i-X (Twitter) ezwakalisa ukunengeka nokudumala kwakhe.
Uthe iziphathimandla zaseBritain zimnqabele imvume yokuya kule ngqungquthela, kuyamcacela ukuthi lokhu kuyimizamo yokumvala umlomo futhi kunenhlese yepolitiki. Uthe lokhu okwenzekayo akwamukelekile.
Kuzokhumbuleka ukuthi ngo-2022 iqembu likaMalema i-EFF lakhipha isitatimende esikhombisa ukungazwelani nokukhothama kweNdlovukazi yamaNgisi u-Elizabeth Alexandra Mary Windsor.
Lesi sitatimende sakubeka kwacaca ukuthi leli qembu alizweli ngokukhothama kwale Ndlovukazi yamaNgisi ngoba kulikhumbuza izikhathi ezinzima eNingizimu Afrika nasezwenikazi i-Afrika.
