IQEMBU lezepoitiki i-EFF seliphumele obala ngoDkt Mbuyiseni Ndlozi obesekunesikhathi kunemibuzo ngekusasa lakhe kuleli qembu.
Esitatimendeni esikhishwe yileli qembu liveze ukuthi uNdlozi akasabuyeli ePhalamende kulandela ukuzisulela kwakhe ngaphandle kokuphoqwa.
Leli qembu liveze ukuthi lithole izincwadi ezimbili zokusula kwamalungu alo abelimele ePhalamende likazwelonke naseSishayamthetho sase-Eastern Cape.
Liveze ukuthi lithole izincwadi kaNdlozi nekaYazini Tetyana abazithumele ehhovisi likaNobhala Jikelele.
Isitatimende siqhuba ngokuthi la malungu abonge leli qembu ngethuba lokulimela ePhalamende nokusebenzela abantu baseNingizimu Afrika.
I-EFF izamukelile lezi zincwadi laveza ukuthi la malungu asebenze ngokuzimisela nangokuthembeka ezinhlakeni abebejutshwe kuzona.
I-EFF ichaze la malungu njengayisibonele sokusebenza ngokuzikhandla.
