ISIHLABE ikhwelo iNdlunkulu kaZulu, yathi uhlangothi oluchithwe yiNkantolo yoMthe-thosisekelo, ngombango wesihlalo sobuNgo-nyama, malubuye ngoba alukaze lukhishwe komkhulu.
UMntwana waseZibindini, uThulani
kaGqikazi Zulu, ubekhuluma eMkhosini waMaganu, obusesigodlweni saseMachobeni, eNgwavuma, ngoMgqibelo.
INkantolo yoMthethosisekelo, ikhiphe isinqumo sokuchitha icala elafakwa nguMntwana uSimakade, ephikisana nokubekwa kweSilo uMisuzulu. Selokhu kwakhothama iSilo uMdlokombane
(iNgonyama uZwelithini kaBhekuzulu), abaseNdlu-nkulu kaZulu, abeseka uMntwana uSimakade, bebephuma bengena ezinkantolo, bephikisa ukuphakanyiswa kukaMisuzulu ukuthi abe yiSilo.
NgoMfumfu (October) wango-2022, uMisuzulu kaZwelithini ugcine esegcotshiwe njengeSilo sikaZulu. Uhlangothi olweseka uMntwana uSimakade, lwaya eNkantolo eNkulu eMgungundlovu, sachithwa isicelo sokuthi isinqumo siguqulwe, lwadlulela eNkantolo yokudlulisa amacala eBloemfontein, lwachithwa nakhona.
NgoLwesihlanu, iNkantolo yoMthethosisekelo, eBloemfontein, “ishayele isipikili sokugcina”, isiqinisekisa ukuthi uMisuzulu nguyena oyiNgonya-ma kaZulu.
UMntwana uThulani, uthe ngesikhathi kuqhubeka la macala, bebengenalo uvalo ngoba bebazi ukuthi isihlalo sobukhosi ngeseSilo uMisuzulu.
“Sibonga amabutho abephuma ngobuningi uma kuyiwa eNkantolo eBloemfontein, eyokweseka iSilo. AbaseNdlunkulu, abebesembangweni, kodwa bakhala ngaphansi, sithi kabakaze baxoshwe ko-mkhulu, mababuye kusetshenzwe,” kusho uMntwana uThulani.
ISilo sesethula inkulumo, kasigxilanga esinqumeni esikhishwe yinkantolo, kodwa sibonge bonke abantu abebeseseka, sathi uSotswebhu oMkhulu wesiShayamthetho, saKwaZulu-Natal, uMnu Blessed Gwala, ubenaso kusukela kusekhona
uMntwana waKwaPhindangene, iNkosi uMangosuthu Buthelezi.
ISilo sibonge amabutho namakhosi, sathi njengoba “lolu thuli” selungasekho, sizoqhubeka sisebe-nzele abantu bakayise ngoba siyabathanda.
IPhini likaNdunankulu kaZulu, iNkosi yaseMaDungeni, iNkosi uPhathisizwe Chiliza, lithe njengoba inkantolo isikhiphe lesi sinqumo, yaqinisekisa isikhundla seSilo uMisuzulu, sekuvuleke elinye ikhasi, lokuqhubeka nokuletha intuthuko ezizweni zamakhosi, lavaleka thaqa, elombango wesihlalo.
Okhulumela uhlangothi lukaMntwana uSimaka-de, uMntwana uThokozani Zulu, uthe sebetsheliwe ngabameli babo ngesinqumo esikhishwe yiNkantolo yoMthethosisekelo ngoLwesihlanu, kodwa basazohlangana bese bebiza isithangami sabezindaba.
Uthe kababoni bezosebenzisana nabaseNdlu-nkulu kaZulu abebeseka iNdlulamithi, ngoba kuni-ngi okungelona iqiniso obekukhulunywa ngabo, kusaqhubeka amacala.
menzi.jele@ilanganews.co.za
