LUCKY CAIN
KUZOQHAKANJISWA amafilimu avutshelwe KwaZulu Natal kwindumezulu yaminyaka yonke ebizwa ngeKwasukasukela Film Festival and Workshop ezobanjelwa ehholo laseMsinyane eJozini ngaphansi koMkhandlu uMkhanyakude kusukela ngomhla ka-12 kuya kumhla ka-15 kwephezulu.
Le ndumezulu ezobe isiyenzeka okwesi-8 kulo nyaka kulindeleke ukuthi ihehe iningi labantu abasha abaqhamuka ngaphansi kwalo mkhandlu namaphethelo abazimisele ukungena emkhakheni wezamafilimu nomabonakude.
Kulindeleke ukuthi abazoyihambela bacobeleleke ngolwazi oluzulu oluthinta lo mkhakha njengoba kuzoba nezikhulumi ezahlukene esezizakhele igama kulo mkhakha.
Okhulumela le ndumezulu uSbonelo Mbutho owaziwa ngelikaSbo Da Poet uthe kulo nyaka lizoqhubeka nokwenyuka izinga njengoba eqhubeka nokwanda amafilimu aqoshelwa kulesi sifundazwe ikakhulukazi khona eMkhanyakude.
Ubale amafilimu okubalwa kuwa Amaphupho neNgoduso Yami okungamafilimu aqoshelwe eMkhanyakude njengamanye azobe ekhonjiswa kule ndumezulu.
Ubale namanye azobe ekhnjiswa okubalwa kuwo Intandokazi eqoshelwe KwaMaphumulo, Matolwana 4 Trip To Durban eqoshelwe eThekwini naseMatatiele, Interrogation Room eqoshelwe eThekwini neSierra’s Gold yona eqoshelwe eGauteng.
USbo Da Poet ophinde abe yimbongi eyaziwa ngezinkondlo ezahlukene uthe intsha efuna ukucobeleleka ngolwazi kumele iphume ngokubuningi njengoba kuzobe kungenwa mahhala.
Phakathi kwezikhulumi eziqavile kule ndumezulu kubalwa uSbongeleni Mabuyakhulu osezakhele igama ngokusebenza emidlalweni eyahlukene kumabonakude okubalwa kuyo iYizo Yizo, Isibaya, House Of Zwide, Shaka Ilembe neminye noSbo Da Poet naye oseke waliveza ikhona lakhe kumabonakude njengoba eseke wabonakala kwiSibaya nakwiGomora namanye amafilimu aqoshelwe iuleli.
Uthembise ukuthi abazohambela le ndumezulu bazophuma sebethuthuke ngolwazi olunzulu.
