UNGQONGQOSHE wezokuVakasha uNkk Patricia de Lille unikwe izifundo zamahhala zokuthi idliwa kanjani iBunny Chow ngesikhathi ehambele umcimbi wokwethulwa ngokusemthethweni kwe-Africa’s Travel Indaba eThekwini.
Lo mcimbi bewubanjelwe eMoses Mabhida Stadium, kanti kuwona bekuyokwethulwa izinhlelo zale ngungquthela yezokuvakasha enkulukazi e-Afrika, ezokuba ngomhlaka-12 kuya ku-15 kuNhlaba (May).
IBunny Chow ngesinye sezidlo elidume ngazo iTheku njengoba linesibalo esiphezulu sabomdabu waseNdiya.
UDe Lille uthe iNingizimu Afrika isimi ngomumo ukwemukela izinkumbi zezihambeli nezivakashi ezivela emazweni ahlukene kule ngqungquthela.
Wengeze ngokuthi ezokuvakasha ngenye yezinto okungagxilwa kuzona ukugqugquzela ukulingana kubantu nokufukula imiphakathi eyayicindezelwe phambilini.
Uthe njengomnyango, izingqungquthela ezinjengalezi ngamathuluzi abalulekile ukwandisa sifinyelele ku-50 million isibalo sezivakashi eziza kuleli njalo ngonyaka.
