KUQUBULE imibuzo ngokuphepha kwezakhamizi zakuleli ukuboshwa kwesinye sezigebengu eziyingozi ezeqa ejele laseMozambique ngonyaka odlule.
UNelson Simiao Massango ongesinye seziboshwa ezingaphezulu kuka-1500 ezeqa ejele laseMozambique ngesikhathi kusuka izibhelu ngoZibandlela (December) nyakenye. Uboshwe egalaji elibolekisa ngezimoto endaweni yabadla izambane likapondo eSandton, eGoli.
Kuvele ukuthi ubedonsa isigwebo seminyaka ewu-20 ngecala lokubulala, kanti kuleli uyanyaniswa noxhaxha lwamacala okwebiwa kwezimoto zaseNingizimu Afrika, ziweliswe umngcele, ziyodayiswa eMozambique. Kuthiwa ezinye zezimoto ubeziboleka kwamanye amagalaji, zingaphinde zitholakale.
Kunengebe kumalungu omphakathi wakuleli ngokuthi ziningi izigilamkhuba ezibaleka emazweni azo, zizoqhubeka nokugila imikhuba kuleli. Sekukaningi kukhalwa ngokuthi ukuvuza kwemingcele yakuleli ibeka engcupheni impilo yezakhamizi.
Okhulumela amaphoyisa kuzwelonke uBrigadier Athlenda Mathe uthe: “I-SAPS Border Policing High Density Team isebenza ngokuzikhandla ukuqinisekisa ukuthi ithola imikhondo ngezigebengu okungenzeka ukuthi zikwazile ukufika eNingizim Afrika.”
NgoMasingana (January) walo nyaka kuvele ukuthi bangaphezulu kuka-22 000 abantu abakuleli ngokungemthetho ababoshwe emajele akuleli, okudla izizumbulu zemali yabakhokhi-ntela.
Baphawule kanje abantu enkundleni yezokuxhumana iX (Twitter) ngodaba lukaMassango:
@KMchuba: Sawutshela uhulumeni ukuthi lezi zigebengu zilibangise eNingizimu Afrika, sathathwa njengabantu abasanganayo.
@Encephalogist: Kwenzeka kanjani ukuthi umuntu akwazi ukuboleka imoto eSandton, ayithathe ayiwelise umngcele iye eMozambique? Kanti laba ababolekisa ngezimoto kabayihlolisisi yini imininingwane yomuntu ngaphambi kokumnika imoto?
@Solly07makwe: Iwumsangano nje le nto yokuthi osopolitiki bagadwe, baphephe ukwedlula abantu ababavotele. Ayikho nto abayithatha njengemqoka, ikakhul eyokulwa nobugebengu nokungena kuleli ngokungemthetho.
@Kgafelo2: Manje isigebengu sidlula kanjani emngceleni? Impela iNingizimu Afrika isiphenduke isidleke sezelelesi.
@MaphutiClifford: Bonke, bowu-1500 balapha eMzansi. Angicabangi ukuthi beqa, badedelwa nje ukuze beze kuleli.
@Phumzile2024: Niyamkhumbula kodwa u-Ananias Mathe waseMozambique?
