“NGAYISUNGULA ngingedwa i-EFF, ngayiqamba igama, uphawu lwayo, imibala yayo nokuthi ikomkhulu layo kumele libe kuphi. Bonke abangamalungu ayo babelandela mina. Naye lo oyiholayo (uJulius Malema) walandela mina.”
Lawa ngamazwi kaNobhala-Jikelele woMkhonto Wesizwe Party (MKP) uMnu Floyd Shivambu, awasho ngesikhathi iMKP ihambisele izaguga zaseMahonisi, eLimpopo, uKhisimusi.
UShivambu, obeyisekela likamengameli we-EFF iminyaka eyishumi ngaphambi kokwesula kuyona ajoyine iMKP ngo-Agasti kulo nyaka, utshele lezi zaguga ukuthi umqondo wokusungula i-EFF wamfikela ngesikhathi exoshwe yi-ANC Youth League, ayengumkhulumeli wayo ngo-2011.
UShivambu ubuye wanxexa abantu abadala ukuba bavotele iMKP, wachitha eyokuthi leli qembu ngelohlanga lwamaZulu kuphela. Kuzokhumbuleka ukuthi ukushiya kukaShivambu kwi-EFF kwaholela ekutheni namanye amalungu eqembu ahambe.
Lokhu kwaholela nasekungacacini kwekusasa lelungu le-EFF eliqavile uDkt Mbuyiseni Ndlozi, njengoba uMalema emsola ngokungathembeki. UNdlozi ubengekho engqugqutheleni yokukhetha ubuholi beqembu futhi akakhethwanga ukuba yingxenye yesigungu esithatha izinqumo kulona.
Ngeledlule kwethuke abaningi enkundleni yokuxhumana i-X (Twitter) uNdlozi esusa umbhalo othi uyilungu lephalamende le-EFF.
