WETHULWE njengeNhloko yoMnyango wokuHlaliswa kwaBantu, lowo owayeyimeneja kumasipala iRay Nkonyeni nowaphunyukwa yiqatha lokuba yimeneja yedolobha iTheku.
NgoMsombuluko uMnu Siboniso Duma onguNgqongqoshe kulo mnyango wethule uMnu Max Mbili, njengenhloko yomnyango wathi unethemba lokuthi uzokwazi ukuhlanganisa zonke izinhlaka ezahlukene kulo mnyango zibe yimbumba.
“Ukuzama ukuqinisekisa ukuthi siyakwazi ukuxazulula izinkinga ezikhona emiphakathini sesiqoke uMbili njengenhloko yomnyango. Okuhle ukuthi ukuqokwa kwakhe kwakumelwe nayikomiti elisebenza ngaphansi kwalo mnyango. UMbili unesipiliyoni esimangalisayo kuhulumeni kanti uke wasebenza njengeChief Director-Corporate Services kuwona lo mnyango, waphinde wasebenza njengemeneja kumasipala iRay Nkonyeni,” kusho uDuma.
Uthe ngaphansi kweso lakhe uMbili umasipala iRay Nkonyeni wenze kahle, waze wathola umbiko ongenagcobho njengabanye bomasipala abanemali ephethwe kahle, kanti wake waqokwa nanjengomeneja owenza kahle kakhulu esifundazweni.
“Ubambe iqhaza elikhulu ekwakhiweni kwezindlu ezingaphezulu kuka-4000 kulo masipala waphinde wanobudlelwano obuhle noMnyango wezokuHlaliswa kwaBantu,” kusho uDuma.
UMbili uthembise ukuthi uzokwenza konke okusemandleni akhe ukuthi kwenzeke umsebenzi okumele wenziwe yihhovisi lakhe kuphinde kube nokusebenza ngokubambisana nazo zonke izinhlaka ezifanele. nonhlakaniphos@ilanganews.co.za
