UTHI weswele amazwi okubonga owesifazane waseThekwini obevaleleke ezweni lase-United Arab Emirates (UAE), uNkz Bongile Ntombela, ngoba ekweleta ibhange lakhona imali engaphezulu kuka-R120 000.
Le ntokazi yenza i-video egcine isabalala ezinkundleni zokuxhumana, ikhala ngokuvaleleka kuleliya lizwe ngemuva kokuphelelwa wumsebenzi. Kuthe isithi ibuyela eNingizimu Africa, yatshelwa ukuthi ngeke ivunyelwe kuhamba ingayikhokhile imali yaleli bhange.
Namhlanje uNkz Ntombela uveze ukuthi isihlangene u-R120 000 imali eseyinikelwe ngabantu angabazi, ngemuva kokukhala kwakhe, ecela usizo.
“Lesi simo singenze ngakholelwa ekutheni basekhona abantu abanomusa nabakwazi ukusiza umuntu. Ngiswele amazwi okubonga, ngiyathobeka kakhulu bantu baseNingizimu Afrika,” kusho yena.
Uthi yize noma kuqale kwaba nzima kuye ukucela usizo kubantu bakuleli ezinkundleni zokuxhumana, kodwa ukuzehlisa kumsizile ngoba ukube uthulile wangakhuluma, ngabe akakalutholi usizo. Uqinisekisile ukuthi isonto elizayo liyophela esekuleli lizwe.
nonhlakaniphos@ilanganews.co.za
