KUBE yinjabulo kumalungu omphakathi waKwaDukuza namaphethelo kuvulwa ngokusemthethweni irenki yamatekisi esithuthukisiwe eBallito izolo ngoLwesibili.
Umphakathi ubuthwala kanzima uma uyogibela amatekisi njengoba ibala ebeselisetshenziswa njengerenki, engaphansi kweDolphin Coast Taxi Association (DCTA), belisesigangeni, futhi lingakhonkiwe.
Yethula inkulumo emcimbini wokuvulwa kwale renki, iMeya yaKwaDukuza uMnu Ali Ngibi, ithe babone kubalulekile ukuthuthukisa ingqalasizinga yamatekisi ngoba idlala indima emqoka ekuthuthukiseni umnotho wendawo.
Le renki ibalulekile ngoba iphinde ixhumanise idolobha lakwaDukuza nezindawo ezakhe iTheku ezinjengeVerulam, uMhlanga, uThongathi nasenkabeni yedolobha iTheku.
“Le renki ayigcini nje kuphela ngokuba yisakhiwo, kodwa iwubufakazi bokuzibophezela kwethu ekwakheni izindawo zokuhweba ezingcono futhi ezivuleleke ngokulinganayo kuzona zonke izakhamizi,” esho.
UMnu Simphiwe Nxumalo, ongumgibeli wetekisi, uthe bekuba nzima kakhulu kule renki, ikakhulukazi uma linetha noma kushisa.
“Besixhafuza udaka, kushinilika, sinethwa yimvula njengoba lapho besigibelela khona belungekho uphahla,” esho.
UMnu Siyabonga Ntombela, okhulumela iDCTA, uthe nakuba bekuthokozela abakwenzelwe wumasipala, kodwa babona le renki izokuba ncane kakhulu njengoba siqhubeka nokwanda isibalo sabantu abasebenzisa idolobha laseBallito.
