IBICHICHIMA yinjabulo iMeya yeTheku, uMnu Cyril Xaba, ngesikhathi ivula ngokusemthethweni inxanxathela yezitolo eNtshongweni, entshonalanga yedolobha, ngoLwesine.
Le nxanxathela yezitolo, eyaziwa ngeWestown Square, iseduze komgwaqo owuthelawayeka, uN3, phakathi kweTheku noMgungundlovu. Isaqhubeka iyanwetshwa njengoba kuzoba khona nezindawo zokuhlala abantu, isibhedlela, nesizinda samabhizinisi.
Ibalelwa ku-R1,5 billion imali esetshenzisiwe ukwakha le nxanxathela yezitolo – uMasipala weTheku waphonsa esivivaneni imali ewu-R600 million. Babalelwa ku-1 000 abantu abebeqashiwe, ngesikhathi yakhiwa kanti isikhangisiwe imisebenzi engu-451, yabantu abazosebenza kuyona.
“Lo msebenzi siwethula ngesikhathi sisazithoba amanxeba ngomonakalo osanda kusehlela, sikhahlanyezwa yizikhukhula. Siyabonga ngoba kuzodaleka amathuba emisebenzi, nabatshalimali babone ukuthi kungcono ukuvula amabhizinisi KwaZulu-Natal,” kusho uXaba.
INkosi yendawo, uBhekamanganga Shozi, ubongele umphakathi waseMangangeni namaphethelo, wathi le nxanxathela ilethwe ngesikhathi ikati lilele eziko emindenini eminingi. Uthe lokhu kuzoletha intuthuko endaweni.
