UPHIKO oluphenya ukuziphatha kwamaphoyisa, i-Independent Police Investigative Unit (IPID), selwengezelwe isabelomali, ukuze kube lula ukwenza umsebenzi walo. Kukhalwe ngokuthi sincane isibalo sabaphenyi abangaphansi kwalolu phiko, yikho umsebenzi walo ubambezeleka.
Abalelwa ku-15 000 amacala angakaqedwa ukuphenywa ngenxa yokushoda kwabaphenyi. Sikhuluma ePhalamende likaZwelonke, isikhulu sakwa-IPID, uNkz Dikeledi Ntlatseng, sithe isibalo sabaphenyi, njengoba isabelomali sesenyusiwe, sizosuka ku-387 babe ngu-421 eminyakeni emithathu ezayo, njengoba lolu phiko lwengezelwe u-R126,3 million, eminyakeni emithathu ezayo.
“Izifundazwe ezinezibalo eziphezulu zamaphoyisa aphenywayo yiKwaZulu-Natal neGauteng. Sizokwandisa isibalo sabaphenyi, ngoba ukushoda kwemali, yikhona obekwenza umsebenzi ubambezeleke. Amacala ayanda, ekubeni isibalo sabaphenya amacala singandi,” esho.
