INKANTOLO yoMthethosisekelo isichithe isicelo sokuphonsela inselelo isinqumo seNkantolo ePhakeme yaseWestern Cape sokumisa okwesikhashana uhlelo lokuphenywa kukaMengameli Cyril Ramaphosa ngodaba lwasepulazini lakhe iPhala Phala.
Amaqembu ahlukene epolitiki okubalwa kuwona i-ATM, i-EFF, iMK Party ne-United Africans Transformation abefake amaphepha kule nkantolo efuna kuchithwe isinqumo senkantolo ephakeme.
URamaphosa wafaka isicelo enkantolo sokuba kumiswe ukuphenywa kwakhe yiPhalamende ngemuva kokuphonsela inselelo umbiko weJaji uSandile Ngcobo, owaphakamisa ukuthi kumele aphendule mayelana nesigameko sokwebiwa kwezindodla zamadola aseMelika epulazini lakhe ngo-2020.
Kubhekwe ukuba iNkantolo ePhakeme eWestern ilalele isicelo sikaRamaphosa sokuphonsela inselelo umbiko weJaji uNgcobo ngomhla ka-2 kuya ku-4 kuMandulo (ngenyanga ezayo).
NgoZibandlela ka-2022, amalungu ePhalamende avotela ukuba angaphenywa uRamaphosa ngodaba lwasePhala Phala, okuyisinqumo esichithwe yiNkantolo yoMthethosisekelo ngoNhlaba walo nyaka. Inkantolo yayalela ukuba kusungulwe ikomidi lePhalamende ukuphenya ukuthi kumele yini asuswe esikhundleni uRamaphosa.
“Inkantolo inqume ukuthi akunabo ubulungiswa ukulalela lolu daba okwamanje, ngenxa yokuthi lusazolalelwa eNkantolo ePhakeme yaseWestern Cape. Isinqumo senkantolo ephakeme sizocacisa ukuthi kwenzekani ngesinqumo sokumisa okwesikhashana ukusebenza kwekomidi lePhalamende,” kusho isinqumo seNkantolo yoMthethosisekelo.
