ObenguNdunkulu kaZulu uMfu Thulasizwe Buthelezi usephumele obala kulandela imibiko yokuhoxisa kwakhe kulesi sikhundla esimqoka esihlanganisa iNdlunkulu nesizwe samaZulu.
Esitatimendeni uMfu Buthelezi asikhiphile uveze ukuthi iSilo uMisuzulu kaZwelithini besingakamazisi ngesinqumo saso somhoxisa kulesi sikhundla.
Uthe uqale ukubona ngokuhoxisa kwakhe ezinkundleni zokuxhumana ngencwadi ebisabalele ebingasayiniwe.
Uqhube ngikuthi ngokuhamba kwesikhathi ube esethola i-whatsapp eqhamuka kuMntwana uSimphiwe wakwaMinya nencwadi athe ibibhalelwe amakhosi yabe isisayinwa uyena (uMntwana uSimphiwe).
UMfu Buthelezi uthe kuyamangaza ukuthi umyalezo omqoka kangaka ungathunyelelwa amakhosi ngendlela enganasithunzi kanje. Uqhube ngokuthi usazolinda iSilo simazise ngokusemthethweni ukuthi siyamhoxisa.
UMfu Buthelezi uveze ukuthi kulezi zinyanga eziwu-11 eqhoqhobele lesi sikhundla usebenzele iSilo nesizwe samaZulu ngokuzikhandla nangokuthembeka.
Uthe akukho nakanye lapho iSilo sike sazwakalisa ukungenami noma ukungahambisani nokusebenza kwakhe noma izitatimende abezikhipha emphakathini.
