UMNYANGO weMfundo eyisiSekelo kuzwelonke, uchitha amahlebezi asabalale ezinkundleni zokuxhumana, athinta ukubhaliswa kwabafundi ezikoleni zemfundo eyisisekelo.
Kuleli sonto kusabalale i-poster enophawu lomnyango, eveza ukuthi izikole zikahulumeni akumele zibhalise abafundi uma bengenawo amaphepha afanele, afana nomazisi, izitifiketi zokuzalwa nokunye okuyaye kudingeke uma kubhaliswa abafundi.
Ngokusho kukaNgqongqoshe walo mnyango, uNkz Siviwe Gwarube, le poster ingamampunge, futhi kayiphumi eMnyangweni wezeMfundo.
“Ngifisa ukucacisa ukuthi ayikho ingane okumele iphucwe ilungelo layo lokufunda ngenxa yokungabi nawo amaphepha. Ngokomthetho iSouth African Schools Act, olungiswe ngo-2024 waba yiBasic Education Laws Amendment (BELA) ukubeka kucace ukuthi zonke izikole zikahulumeni kumele zibemukele abafundi, ngale kokushodelwa amaphepha athile.
“Lo mthetho uphinde ukubeke ngokusobala ukuthi izikole zikahulumeni kumele ziqinisekise ukuthi izidingo zabo zonke abafundi ziyanakekelwa, kuze kube baphothula imfundo yabo ezingeni lemfundo eyisisekelo,” esho.
Uthi othishanhloko nothisha kabanalo ilungelo lokunqabela ingane ukuba ibhalise esikoleni ngenxa yale nkinga. Uthi inhloso yokufuna lolu hlobo lwamaphepha, wukuqinisekisa umfundi nomndeni wakhe, hhayi ukumvimba ukuba afunde.
“Othishanhloko abanalo ilungelo lokuvimba umfundi ngenxa yokuthi akanawo umazisi, noma isitifiketi sokuzalwa. Esikugqugquzelayo wukuthi othishanhloko bababhalise abafundi abanale nkinga, bese nabo benze imizamo yokubalekelela ngeminyango efanele,” esho.
Unxuse izakhamizi ukuba ziqaphele izindaba ezingamampunge, futhi ezidukisayo ezinkundleni zokuxhumana.
“Siwumnyango siyacela emalungwini omphakathi ukuba axwaye izindaba ezingelona iqiniso nezidicilela phansi isithunzi somnyango. Izindaba zalolu hlobo kazigcini ngokudicilela phansi isithunzi somnyango, kodwa zidala uqhekeko phakathi kwabafundi nothisha ezikoleni.
“Abazali nabafundi abakhathazekile ngokumele bakwenze uma bebhalisa, bayacelwa ukuba bafune usizo emahhovisi ezemfundo ezingeni lezifunda nezifundazwe, noma bavakashele i-website yomnyango ethi: www.education.gov.za babheke ngaphansi kohlelo lwe-admission,” kuphetha uGwarube.
ngubo@ilanganews.co.za
