INKANTOLO eNkulu yaseMgungundlovu isinqumele isiShayamthetho ukuthi sibuyisele esikhundleni ilungu lephalamende, uNkk Mbali Shinga ochithwe yiqembu lakhe iNational Freedom Party (NFP) ekubeni yilungu layo ngenxa yokungabulaleli ubuholi beqembu.
UNkk Shinga ophinde abe nguNqqongqoshe woMnyango wokuThuthukiswa kwaBantu kwaZulu-Natal, kuthiwe akabuyiselwe emsebenzini wakhe ngokugcwele.
Inkantolo iyalele uSomlomo esishayamthetho, uNkk Nontembeko Boyce, ukuthi angayenzi nhlobo imizamo yokuthi uNkk Shinga agudluzwe ngokugcwele esikhundleni sakhe kuze kube kuphothulwa udaba lakhe njengoba efake isicelo esiphuthumayo enkantolo ngokuchithwa kwakhe.
Iphinde inkantolo yayalela uNkk Boyce ukuthi angawulaleli umyalelo wencwadi ebhalwe yiNFP ebicela ukuthi agudluze esikhundleni uNkk Shinga ngoba lokho kuzobe sekuphambene nomthetho. Ukuchithwa kukaShinga yikomiti lokubuyekezwa kwamacala kwiNFP, inkantolo ithe nakho icela kumiswe. Kwenzeka lokhu nje i-NFP ibisezinhlelweni zokufungisa umengameli wayo, uMnu Irvan Barnes ukuba yilungu lephalamende kwaZulu-Natal obekuyinto ebingakaphothulwa.
ILANGA lithole ukuthi kube nokudideka kwiNFP ngokuphuma kwalesi sinqumo ngenxa yokuthi inkantolo ike yakhipha isinqumo sokuthi udaba lukaShinga aluphuthumi, yase icela ukuthi ayobonisana nabeqembu lakhe bavumelane ngosuku abazoza ngalo enkantolo. Kulokhu kuthiwa iNFP ivele yatshelwa ukuthi ayize enkantolo kwafike kwaphuma lesi sinqumo.
