INKANTOLO yezeziSebenzi (Labour Court) isikhiphe umyalelo wokuthi inkampani ekhiqiza insimbi, i-ArcelorMittal South Africa, enamagatsha eNewcastle (KwaZulu-Natal), naseVeeriniging (eGauteng), ukuba ibuyisele emsebenzini izisebenzi ezixoshile.
Le nkampani idilize izisebenzi, ngoba ithi isiyavalwa, ngoba umkhiqizo kawusahambi kahle. Inyunyana iNational Union of Metalworkers of South Africa (Numsa), ibenezigxoxo nabaphathi benkampani, kodwa bona baduba ngoNdasa (March), izingxoxo zingakapheli.
Ekuqaleni kwale nyanga (uMfumfu), iNumsa iqonde enkantolo, imangalela ibaqashi. Inkantolo ithe abaphathi benkampani mabaqale phansi izingxoxo neNumsa, zingapheli izinsuku eziyishumi. Inkantolo ibuye yayalela inkampani, ukuthi ikhokhele izisebenzi eyazixosha imali yazo kusukela ngelanga ezakhonjwa ngalo indlela.
Okhulumela iNumsa, uNkk Phakamile Hlubi-Majola, uthi isinqumo senkantolo siwukunqoba kubasebenzi.
“Abaphathi benkampani batshelwa ngoJanuary, ukuthi bangabaxoshi abantu abasebenzayo, ngoba kwakunezinhlelo zokuthi uhulumeni ungenelele. Bona bashiya phansi izigxoxo, bagcina ngokuxosha izisebenzi. Lesi sinqumo senkantolo, sizovula abaqashi amehlo, futhi siwukunqoba kithi njengenyunyana, izisebenzi ebesizimele nemindeni yazo,” kusho uNkk Hlubi-Majola.
Inkampani ibingakasikhiphi isitatiende ngegxathu ezolithatha ngemvuka kokuphuma kwalo myalelo wenkantolo.
menzi.jele@ilanganews.co.za.
