ISIBALO sasebesayine ukwesekwa umkhankaso wokuthi intombazane esencane (7), eyaziwa ngelikaCwecwe, ithole ubulungiswa sesifinyelele ngaphezulu kuka-900 000.
UCwecwe kubikwa ukuthi wadlwengulwa emagcekeni esikole Biergville College, eMatatiele, e-Eastern Cape ngoMfumfu (October) ngonyaka odlule, ngesikhathi elinde imoto eyayizomthatha imyise ekhaya, esuka esikoleni esizimele.
Lesi sigameko sisukumise abaningi ezinkundleni zokuxhumana okubalwa kubona nosaziwayo ngemuva kokuba unina wengane eveze intukuthelo ngendlela isikole esisingathe ngayo lolu daba. Kusukela izolo nanamhlanje kunamamashi ezindaweni ezahlukene eNingizimu Afrika, ukweseka umndeni nesisulu.
Unina wengane, ekhuluma kwenye yama-podcast, wabika ukuthi isikole sehlulekile wukusingatha ngendlela efanele uphenyo. Uthi esikhundleni salokho, isikole siqoke ukubanika incwadi yokuthi ingane iyofunda kwesinye isikole, nakuba bebengayicela abazali.
Kusukela lapho isikole obekufunda kuso isisulu sivaliwe, sakhishwa nasohlwini lwezikole ezisemthethweni, ngenxa yokuthi besenqaba ukusebenzisana namaphoyisa.
Khona manjalo kukhalwa nangabanye besilisa abatshengisa ukungezwelani nesisulu ngokuphosta imibhalo eshaqisayo. Miningi imibhalo esisabalale ezinkundleni zokuxhumana kubatshazwa isihluku salaba besilisa, abanye bephakamisa ukuthi bacetshwe ezindaweni abasebenza kuzo.
Izolo ngoMsombuluko, uNgqongqoshe wamaPhoyisa, uMnu Senzo Mchunu, ukuqinisekisile ukuthi utshishanhloko naye usethathiwe ulibofuzo njengomunye wabathathwa njengabasolwa. UNgqongqoshwe wezeMfundo, uNkz Siviwe Gwarube unxenxe umphakathi ukuba usebenzisane nohulumeni ekufundiseni izingane ngokuhlukunyezwa ngokocansi futhi zibike.
Izinhlangano zepolitiki okubalwa kuzona i-IFP, i-EFF, iMKP, i-ANC, ne-Action SA nezinye, nazo zizwakalise ilaka lazo ngalesi sigameko.
