ATHOLE insangu nogwayi amaphoyisa ngesikhathi egasela kungazelele ezikoleni ezahlukene eNanda ngoLwesibili ekuseni ehambisana nezikhulu zoManyango wezeMfundo ezweni lonke.
Amaphoyisa aKwaZulu Natal ngokubambisana nalo mnyango avakashele izikole Ikusasalethu Secondary, Newtown Combined neNanda Comprehensive ngenhloso yokuzopequlula kwazise le ndawo yaziwa kakhulu ngobugebengu nobuqhwaga.
Amaphoyisa aveze ukuthi ukuvakashela lezi zikole kuhambisana nomkhankaso woMnyango wezeMfundo wokuqinisekisa ukuthi izikole ziba yindawo ephephile futhi ekulungele izingane zifunde nokuqinisekisa ezokuphepha.
Phakathi kwezinto lo mkhankaso ogxile kuzona wukulwa nobuqhwaga ezikoleni, impilo yamagenge ukusetshenziswa kwezidakamizwa nodlame elibhekiswe kwabesifazane nezingane.
Ngesikhathi amaphoyisa epequlula ezikhwameni zabafundi athole insangu nogwayi kwabanye babafundi.
Amaphoyisa aphinde athola ithuba lokuqwashisa nokuxwayisa abafundi ngokubaluleka kokuziphatha kahle nezindlela zokuthi bazivikele ezintweni eziphamene nomthetho.
