IZAME ukufukulana yodwa intsha yaseMsinga esilungizile emanyuvesi ikulekelela esafunda emakhaya. Lokhu kwenzeke esikoleni eMacingwane Secondary eKeats Drift eMsinga ngeledlule kuhlanganelwe khona nabafundi basezikoleni ezingomakhelwane balesi sikole esidume ngokwenza kahle kumatikuletsheni. Bekusizwa abafundi ngokuthumela izicelo zokufunda ezikhungweni zemfundo ephakeme, bechazelwa nangemikhakha ehlukahlukene yasemanyuvesi.
UMnu Sakhile Khubheka okunguyena ophambili kulolu uhlelo, uthi bafuna ukuphakamisa imfundo kule ndawo ngokulethela abafundi endaweni yasemakhaya. Uveze ukuthi kwezinye izindawo bayathathwa abafundi beyothekela ezikhungweni zemfundo ephakeme, kodwa abakule ndawo eMsinga- abalitholi lelithuba ngenxa yokuntula kwemindeni imali yokuhambisa abafundi ezikhungweni zemfundo.
“Ngesikhathi sisungula inhlangano yethu engenzi nzuzo, yeSizwe Esiqhakazile, besifuna ukwenza umehluko ezimpilweni zentsha ikakhulukazi eMzinyathi esidabuka kuwona. UMsinga usilele kakhulu emuva ekulethelweni ulwazi lwemfundo kubafundi. Inhloso yethu njengentsha esifundile emanyuvesi, ngukuthi laba abeza ngemuva bafike sebeqonda kahle izimo zasezikhungweni zemfundo, bathumele nezicelo zokufunda ngendlela eqondile, nangesikhathi esifanele,” kusho uMnu Kubheka.
Uthi abanye abafundi bathumela izicelo kwimikhakha yeziqu abangayiqondi kahle ngenxa yokungabi nalo ulwazi ngayo. Utshele ILANGA ukuthi basezinhlelweni zokuhambela izingxenye eziningi zoMsinga.
“Ngelinye ilanga sifisa ukuthi uMsinga ufane nezinye izindawo ugqame kakhulu ngemfundo njengoba sezikhona izikole ezenza kahle okubalwa yona iMacingwane,” esho.
Kulo mcimbi abafundi balulekwe uMfundisi uSthembiso Zondo ebakhuthaza ngemfundo okubalwa nosonkondlo uSyabonga Mpungose ngezinkondlo ezithinta ukubaluleka kwemfundo nekusasa elihle. Kunandise umculi kamasikandi uMenzi Mabizela.
