UCHAZWE njengenxusa lokuthula nesisebenzi somphakathi ebesikhuthele, uNkk Lungi Annette Mnganga-Gcabashe (64), obeyiPhini likaMengameli we-ANC Women’s League.
UNkk Mnganga-Gcabashe, udlule emhlabeni ngoMgqibelo ebusuku, ngemuva kokugula, kanti ubesenguSihlalo wekomidi lezokuVakasha ePhalamende likazwelonke.
Kusukela ekuseni izolo, ngeSonto, ngesikhathi zizwakala izindaba zokushona kwakhe, abelokhu engene njalo amazwi enduduzo.
UNkk Mnganga-Gcabashe, wazalelwa KwaMashu, wafunda khona waze wabasezinhlakeni ze-United Democratic Front (UDF), i-ANC isavalwe umlomo. Ubambe elikhulu iqhaza, elamula izimpi ze-ANC ne-IFP eLindelani naseSiyanda. Wabasethimbeni elahlakaza imigulukudu eyayihlukumeza umphakathi KwaMashu, eyayibizwa ngamaSinyora.
Ngo-1999, wabayilungu lesiShayamthetho saKwaZulu-Natal, kwaze kwaba wu-2014.
Ukhethwe waba yiPhini likaSihlalo we-ANCWL KwaZulu-Natal, waba ngusihlalo wayo ngo-2008. Ngo-2014 ubeyilungu lePhalamende kuzwelonke, esebenza noSotswebhu omkhulu uNkk Penny Majodina.
NgoNtulikazi (July) ka-2023, ukhethwe waba yiPhini likaSihlalo we-ANCWL kuzwelonke, eyisekela likaNkk Nokuzola Sisisi Tolashe.
Ekhuluma egameni le-ANC KwaZulu-Natal, uMnu Nhlakanipho Ntombela, uthe uKhongolose ugqemeke ingozi engeqiwa ntwala ngokulahlekelwa nguNkk Mnganga-Gcabashe, ngoba ubesuwizo olukhulu emphakathini.
Umchaze njengesisebenzi somphakathi ebesizithobile. UNkk Mnganga-Gcabashe wayeshade noMnu Sipho Gcabashe, owake waba ngunobhala we-ANC, eKZN, kanti ubeqokelwe ethimbeni elibuyisela iTheku esimweni esejwayelekile nguMengameli Cyril Ramaphosa.
Izinhlelo zomngcwabo bezingakadalulwa.
