I-ORLANDO Pirates inohlelo lokukhalima uSipho Mbule (osesithombeni) osanda kujoyina le kilabhu ngaphansi komqeqeshi omusha, u-Abdeslam Ouaddou.
UMbule udume ngokwehluleka wukuziphatha ngaphandle kwenkundla, kodwa ibhola uyalikhulumisa uma esensimini.
U-Ouaddou utshele abezindaba ukuthi izandla bazivulile kuMbule uma kunosizo olukhethekile aludingayo ukuzigcina eyingxenye emqoka yale kilabhu ephumele obala ngokugaqela isicoco seBetway Premiership.
Uthe yize emthanda lo mdlali, kepha akayiswanga nguyena kweZimnyama. Uthe zimethusile izindaba zokusayinwa kukaMbule, okukhombise ukuthi ikilabhu ibubonile ubumqoka bokuba nomdlali ofana naye.
“Kumele azibheke ngaso sonke isikhathi, aziphathe kahle. Sizomsiza uma kukhona lapho edingakhona usizo. Empeleni abadlali badinga ukucathuliswa njengoba besakhula. Uma ungumqeqeshi kumele ukwazi nokuzifaka ezicathulweni
zabo, ukuqonda impilo yabo.
“Kumele uma kuphela isizini, bonke abadlali kube khona abakuzuzile ngekilabhu. Nginethemba lokuthi uMbule uzokwazi ukusisiza ukufeza izinhloso zekilabhu,” esho.
Uthe uzolwela ukunqoba izicoco ngoba kakwamukelekile ukuba ngumqeqeshi oyife-isha ekilabhini enkulu njengeBucs.
“Abalandeli bazobona iPirates entsha, elwela ukunqoba zikhathi zonke nxa isenkundleni,” kusho lo mqeqeshi waseMorocco.
