IQOPHE umlando i-Orlando Pirates Reserves ishaya iMamelodi Sundowns Reserves ngo-2-0 koweDstv Diski Challenge (DDC) emidlalweni wokugcina ngoMgqibelo, eDobsonville, eGoli.
Amagoli aholele ekutheni ezika-Roscoe Krieling ocija iPirates Reserves ziqophe umlando kwazise lo mqhudelwano wanqotshwa yiKaizer Chiefs ngesizini edlule abhakuziswe enethini nguChristian Derbyshire oyisitobha ngomzuzu ka-42 kwathi elesibili leza noMpho Padime ngomzuzu ka-65. Leli goli bekuyiphenathi etholakale ngemuva kokuba iSundowns Reserves idlalise kabi u-Oratile Rantasi ebhokisini maqede yanikwa iphenathi.
IPirates ngabe iwunqobe ngembudlu yamagoli kulo mdlalo ukube amathuba ibiwasebenzisa ngendlela.
Phakathi komlando leli qembu likaKrieling eliwenzile wukuqeda lunamaphuzu awu-75 obekuqala ukwenzeka emlandweni weDDC. Lusonge isizini lunqobe imidlalo ewu-24.
Abanye babadlali ababambe elikhulu iqhaza ekunqobeni lomncintiswano kulesizini ngunozinti walo obala ukhasha ezintini uBayanda Zulu osuka kwiMidlands Wanderers egijima kwiMFC.
Ngokunqoba le ndebe kubhekwe isinqumo sabakwaDSTV mayelana nezinhlelo abanazo ngokunqoba kwalesi sikwati.
Eminyakeni edlule ikilabhu enqobile ibinikwa ithuba lokuvakashela phesheya kwezilwandle ukunika abadlali isipiliyoni sokudlala namakilabhu amakhulu ezinhlaka ezincane akhona.
AmaBhakhaniya amancane agila izimanga kwiDDC nje, nakwiBetway Premiership amise kabi iMamelodi Sundowns ezosonga ngeTS Galaxy kowePremiershipkusasa ngoLwesibili ebusuku ngo-19h30, eMbombela Stadium, eNelspruit.
