MTHOBISI SITHOLE
IZWAKALISE ukuthi isikhathele “wubugebengu” boMnyango wezeMfundo KwaZulu-Natal Sadtu kulesi sifundazwe, ethi izoluphonsa enkantolo udaba lokungakhokhelwa kwezikole imali yezinsiza-kusebenza. Lokhu kuvezwe ngunobhala wale nyunyana kulesi sifundazwe, uNkz Nomarashiya Caluza ngoLwesibili.
Uthe izikole zidonsa kanzima, zikweletwa imali eshisiwe. Utshele ILANGA ukuthi kunezikole ezingakakhokhelwa namanje imali yezinsiza-kusebenza yanyakenye. Uthe selokhu kuqalwe ukubhalwa kwezivivinyo zokuphela konyaka, abanye othishanhloko bacela kosomabhizinisi iminikelo yamaphepha okugaya ukuze abantwana babhale. “Kasikwazi ukuvumela into enjalo ekubeni kuwumsebenzi wethu ukuqinisekisa ukuthi ukufunda nokufundisa kuqhubeka ngendlela efanele ezikoleni,” kusho uNkz Caluza.
Uthe ngokwesabelo somfundi ngamunye eMnyangweni wezeMfundo – kuzwelonke – wabelwa u-R1 602, kodwa KwaZulu-Natal, iyancishiswa abelwe u-R955. “Sifuna ubulungiswa, izikole mazinikwe imali yazo ukuze kusebenzeke. Yingakho silwa nongqongqoshe wezemfundo eyisisekelo – singamshiyi ngaphandle – (USiviwe Gwarube) ngoba ukushoda kwemali esifundazweni, kuthinta nozwelonke,” esho.
Phakathi kwezinto iSadtu ekhala ngazo, wukungakhokhwa “kukachatha’ (pay progession), okuyimali eyengeziwe efakelwa othisha abenze kahle umsebenzi ezifundweni abazifundisayo nodaba lothisha bakwaGrade R. Uthe bawunqumela umnyango ugwayi katiki, kufanele kuvalwe izikole kulo nyaka seyikhokhwe yonke imali ekweletwa othisha nezikole. UMnu Muzi Mahlambi okhulumela uMnyango wezeMfundo KwaZulu-Natal, uthe udaba lwemali luyaxoxwa nomgcinimafa ezingeni likazwe-lonke.
mthobisis@ilanganews.co.za
