INTATHELI YELANGA
UHULUMENI uhlehlise usuku lokuvalwa kokubhalisela ama-spaza njengoba sekuzovalwa ngomhla ka-28 kuNhlolanja (February) wonyaka ozayo. Phambilini kwakumenyezelwe ukuthi kuzovalwa mhla ka-17 kuZibandlela (December).
Kuzokhumbuleka ukuthi ngemuva kokwanda kwezigameko zezitolo ezithengisa ukudla okungekho esimweni, iningi lazo eliphethwe ngabokufika, uhulumeni waqhamuka nesu lokuthi zonke izipaza kumele zibhaliswe ngokusemthethweni, ukuze zikwazi ukusebenza ngaphansi kwemigomo elawula amabhizinisi kuleli.
Kuke kwabikwa izikhawu eziningi ngokushona kwezingane, ezinye zaphuthunyiswa ezibhedlela, ngezinsolo zokudla ukudla okunobuthi okuthengwe kwezinye zalezi zitolo.
Ekhuluma nabezindaba ngoLwesithathu, uNgqongqoshe woMnyango wezoHulumeni baseKhaya nobuHoli beNdabuko, uMnu Velenkosini Hlabisa, unxuse abanikazi balezi zitolo ukuba babhalise lungakafiki usuku olusha lomnqamulajuqu.
Khonamanjalo, esithangamini sabezindaba ngoLwesibili, uNdunankulu wakwaZulu-Natal uMnu Thami Ntuli uthe bewuhulumeni basazoqhubeka nokugasela kulezi zitolo bengamemezelanga, ngenhloso yokuqinisekisa ukuthi zidayisa ukudla okuseqophelelweni elifanele, futhi okungakaphelelwa yisikhathi.
