INHLANGANO yamatekisi iyaziqhelelanisa nemibiko esabalele ezinkundleni zokuxhumana, yokuthi abantu kabasavumelekile ukugibelisa amalungu emindeni ezimotweni zabo.
Lokhu kulandela imibhalo esabalele ethi sekunomgomo othi uma unemoto, kakumele uhambe nabantu abangaphezulu kwababili. Kule mibhalo kuvele nokuthi uma ugibelise abantu abangaphezulu kwababili, ngisho nezingane zakho, kumele zehliswe zigibele amatekisi.
I-South African National Taxi Association Council (Santaco) iveze ukuthi kawukho umgomo obekiwe onjalo, yexwayisa nabantu ukungabhebhethekisi izinkulumo ezingelona iqiniso ezinkundleni zokuxhumana.
UMnu Sfiso Shangase, wehhovisini likaSantaco KwaZulu-Natal, uthe yize beke bazizwa izinkulumo ezinjengalezo, kodwa osuke enza lokho usuke ephula umthetho. Uveze ukuthi wonke umuntu unelungelo lokuhamba ngesithuthi asikhethile.
“Into esilwisana nayo ukuthi umuntu athenge imoto agibeze abantu ngoba efuna ukwenza inzuzo. Kasivumelani nokuthi umuntu akhokhise abantu emotweni ngoba kusuke sekusho ukuthi idinga amaphepha okusebenza uma enza lokho, njengoba nathi embobini sinawo.
“Akukho emthethweni ukuthi umuntu uma egibeze umndeni wakhe emotweni, sekumele wehliswe ngoba nathi sisembonini siyayigibeza imindeni yethu ezimotweni zethu,” esho.
Uthi yize engeke aphike noma avume ukuthi embonini bakhona abenza lokho, kodwa akuvumelekile.
“Njengoba sibheke okhethweni lobuholi obusha, ziningi izinto ezingelona iqiniso ezivele zisabalale. Uma kukhona abazithola bebhekana nale nkinga, siyacela ukuba baye ehhovisi lalowo soseshini, babike khona. Uma bengasizakali, sicela ukuba badlulele ehhovisi lesifunda.
“Kodwa-ke uma nalapho bengalutholi usizo, sebengadlulela ehhovisi likaSantaco esifundazweni ukuze udaba luzolandelelwa. Wonke umuntu unelungelo lokuthenga imoto ezomyisa lapho efuna ukuya khona, inqobo uma engeke akhokhise abantu ngoba uyobe esephula umthetho,” esho
