UNGQONGQOSHE wamaPhoyisa kuzwelonke osabambile uMnu Feroz Cachalia (osesithombeni) uthi bazozizwela ulaka lwengalo yomthetho abazophehla udlame ngosuku lwemibhikisho ehlongozwayo, ezokuba ngoLwesibili, okuhloswe ngayo ukuxosha abantu abakuleli ngokungemthetho.
Kulindeleke imibhikisho ezweni lonke ngomhla ka-30 June njengoba lolu kuwusuku ababhikishi abalubeke njengomqamla-juqu wokuthi kumele sebehambile ngalo abantu abangenamaphepha. Lokhu sekuvuse itwetwe kubantu bokufika njengoba kunezinkumbi eseziphumele obala, zacela usizo lokugodukiswa zibuyiselwe emazweni azo: abanye sehambile ngamabhasi kanti abanye basezindaweni zokulindela.
Noma kunjalo, uhulumeni uthi uLwesibili kuzokuba wusuku nje olwejwayelekile. UCachalia uthi imibhikisho yokuxosha abokufika inomthelela omubi kwezomnotho futhi ilimaza ubudlelwano belakuleli namanye amazwe.
“Labo abahlela udlame kule mibhikisho, bacekele phansi impahla noma kufe abantu, bazobhekana nengalo yomthetho. Angazi noma bayazi yini ukuthi ngamunye ngamunye angashushiswa ngayedwana, ngokwephulwa komthetho emamashini abawahlelile,” esho.
Uthe amaphoyisa ami ngomumo ukuqinisekisa ukuthi imibhikisho ehleliwe iba nokuphepha nokuthula. Uthe uzohlangana nongqongqoshe wezokuvikela nondukankulu bezifundazwe ukuze kusetshenziswane.
