ULOKHU eqhubeke njalo nemizamo yokuqoqa imali ecela ku-R40 million, ayikweletwa yisiqumama saseThekwini, uShauwn “MaMkhize” Mkhize, umthelisi waseNingizimu Afrika, iSouth African Revenue Service (Sars).
Lokhu kuza ngemuva kokuba iSars, ifake isaziso sokuthengiswa kwezinye zezimpahla zikaMaMkhize, okulindeleke ukuba zidayiswe endalini phakathi nale nyanga.
Ezinyangeni ezimbili ezedlule, izithunywa zakwaSars zigasele emzini kaMaMkhize oseSandton, eGoli, zashaqa izimpahla, zaphinda zanikela emzini kadadewabo, uNkk Nozipho Mkhize-Ngubo, oseLions Park, ngaseMgungundlovu, nakhona zenza okufanayo.
ILANGA Lempelasonto lazifikela mathupha emzini kaNkk Ngubo, latheleka izithunywa zakwaSars zimatasa, ziqoqa izimpahla eziphambili, okwathatha izinsuku ezimbili ukuba ziphothule umsebenzi.
Umkhulumeli weSars, uMnu Siphithi Sibeko, watshela leli phephandaba ukuthi ukuqoqwa kwezimpahla emzini kaNkk Ngubo, kungenxa yokuthi igama lakhe libhaliswe njengomunye weziphathimandla zesikhwama somndeni esikweleta iSars, iShandi Trust.
Wathi uma kuwukuthi izimpahla ezidayisiwe kazifinyeleli enanini elikweletwayo, iSars izophoqeleka ukulandela amanye amagama asohlwini lweziphathimandla zeShandi Trust.
Phakathi kwezimpahla ezizodayiswa kule nyanga endalini yokuqala engomhla ka-17 no-18 kuNovember, eBapsfontein, eGoli, kubalwa izinto zasendlini, imishini yokujima, ama-piano amabili, ifenisha okukhona kuyo izihlalo, osofa, ama-tv acela ku-10, nokunye okuningi.
Endalini yesibili engomhla ka-24 no-25 kuNovember, ezokuba seMgungundlovu, kuzodayiswa izinto eziphathelene nezinkampani zokwakha (construction equipment) okubalwa kuzo ama-container, amaloli afaka phakathi iVolvo, i-Iveco, iPowerstar ethutha amanzi newumatipane, yi-TLB, ama-generator, nokunye okuningi.
Kweyokugcina nayo engomhla ka-24 no-25 khona eMgungundlovu, kuzodayiswa amabhodlela otshwala ahlukene awu-363. Phakathi kwawo kukhona eleRemy Martin Louis XIII, elibiza imali engaphezulu kuka-R80 000.
Abafisa ukuthenga kumele babhalise ngemali ewu-R20 000, bese belandela imithetho efakwe kwi-website, okufakwe kuyo isikhangiso seBidders Choice Group.
