INZIMA impilo kowesilisa waseMlazi, othathelwe imishwalense yokufa, yakhokha ngoba kuthiwa ufile kulandela ukubanjwa inkunzi, waphucwa nomazisi.
Ijamile impilo kaMnu Lethuxolo Chiliza (26), njengoba eMnyangweni wezaseKhaya kuvela ukuthi sewashona.
‘Ubulawa’ nje, ubethathelwe imishwalense yokufa kwaSanlam nasebhange iCapitec. Uthi uthuke woma eshayelwa ucingo ngumphenyi wakwaSanlam, ethi bathole isicelo senkokhelo ngokufa kwakhe.
Uthi umphenyi wathi ngokombiko abawutholile, ushonele KwaNdengezi ngemuva kokugula. ICapitec bese imkhokhelile umuntu obemkhavile.
ILANGA liwabonile amaphepha asemakhazeni, abhalwe nemininingwane kadokotela okuthiwa wamhlinza. Uthi ngoNhlolanja (February) wangonyaka odlule, wabanjwa
inkunzi kwaF, eMlazi, kwalahleka nomazisi wakhe.
Uthi wabika emaphoyiseni, wenza nencwadi efungelwe, ngaphambi kokuyoshaya umazisi omusha, owaphuma ngomhla ka-27 kuNhlaba (May) wangonyaka odlule.
“Sekuze kwavaleka nemali yami engiyigcine ebhange ngoba kuvela ukuthi ngishonile,” esho.
Uthi eMnyangweni wezaseKhaya, bakuqinisekisile ukuthi uvela njengomuntu osewashona. Uthi bazama ukuyilungise inkinga, bamginqisa izithupha, bamtshela ukuthi bazomthinta.
Uthi kuze kube yimanje kabakaze bamthinte, ngisho eya khona kayikho incazelo ayitholayo.
UChiliza ukhala ngokuthi yonke indawo kusavela ukuthi sewashona. Uthi nasemsebenzini useke wahlala isikhathi eside engaholi, ibhange livale i-account yakhe ngoba kuthiwa sewashona.
Uthi ngeledlule uthole ucingo oluphuma kwinyunyana yasemsebenzini wakhe, ibuza ukuthi kungani ingathathwa imali yakhe yempesheni yokufa ngoba unezinyanga eziwu-6 ashona.
Uthi lokhu kusakhomba khona ukuthi namanje usathathwa njengomuntu ongasekho emhlabeni. Uthi ufisa ukuthola usizo ukuze impilo yakhe iqhubeke.
Isikhulu esiphezulu eMnyangweni wezaseKhaya, eThekwini uMnu Mbongeni Magagula, sitheuChiliza kumele afike emahhovisi abo ukuze bezobheka ukuthi angasizakala kanjani.
