UHLABA ikhwelo umnyango wezeMfundo KwaZulu, wexwayisa abafundi bakamatikuletsheni, ngokusabalala kombombayi bamaphepha asuke engakabhalwa, ezivivinyo zokuphela konyaka.
Umnyango uthi abafundi ababhalayo kumele baqikelele ukuthi bayaziqhelelanisa nezinkundla zokuxhumana, njengoba kuyisikhathi sokubhala. Okhulumela lo mnyango, uMnu Muzi Mahlambi, uthi kuyenzeka kubonakale amaphepha ezivivinyo okungesiwona azobhalwa, bese abafundi begxila kuwona, benze imizamo ‘yokuhlinza imbuzi’.
“Umatikuletsheni siyawukhuza, mawuziqhelelanise nezinkundla zokuxhumana ngalesi sikhathi ngoba kuningi okusabalala kuzona, okungesilona iqiniso. Uma sekukhona iphepha okuthiwa lizobhalwa elisabalele ezinkundleni, abantwana bagxila kulona, kanti ngamaqubu entenesha,” esho.
Uthi abafundi bayanxuswa ukuthi njengoba kubhalwa, bafike kusasele okungenani ihora ukuba liqale iphepha. Uthi kubalulekile ukuba abafundi balandele imiyalelo uma kubhalwa izivivinyo.
“Omakhalekhukhwini, nanoma ngabe yini esetshenziselwa izinhlaka zokuxhumana, kayivumelekile njengamanje. Umntwana makabhekisise isikhwama sakhe, nasemaphaketheni ukuze aqinisekise ukuthi kakukho okungemukelekile kuyena endaweni yokubhalela,” kusho uMahlambi.
Utshele ILANGA ukuthi abafundi noma ngabe batshelwa izimpendulo zemibuzo yamaphepha, kumele bangavumi ukukotsheliswa ngoba bazobanjwa uma sekumakwa amaphepha abo, bese ingaphumi imiphumela yabo mhla ka-13 kuMasingana (January) ngonyaka ozayo.
KwaZulu-Natal bawu-195 899 abafundi ababhala u-matric kulo nyaka. Abawu-179 751
babhala ngokugcwele (full-time), bese kuthi abawu-16 148 babhalisele ukubhala ngezikhathi ezithile (part-time). Lokhu kusho ukuthi isibalo sabafundi ababhalayo, senyuke ngo-3% uma siqhathaniswa nesangonyaka odlule, lapho okubhale khona abafundi abawu-190 452.
Abagada izivivinyo bawu-6 450, izikhungo okubhalelwa kuzona ziwu-1 705 ezikahulumeni, ezizimele ziwu-61. Uma sekuphothuliwe ukubhalwa kwamaphepha, azomakwa ngothisha abawu-7 889. Ukumaka kuzoqalwa ngomhla ka-2, kuvalwe ngomhla ka-12 kuZibandlela (December), ezikhungweni eziwu-32.
