KUXWAYISWE izitshudeni eziyoqala esikhungweni semfundo ePhakeme iDurban University of Technology (DUT), ngonyaka ozayo, ngezigilamkhuba ezizofuna imali, zithembisa ukuzifaka ezikhaleni zokufunda.
Lesi sexwayiso sikhishwe yisikhulu esiphezulu esibhekelele ukwemukelwa kwezitshudeni esikhungweni, uDkt Ntombenhle Nombela-Mseleku, ngesikhathi ethula umbiko wokulungela ukwamukela izitshudeni ngonyaka ozayo.
UDkt Nombela-Mseleku uthi minyaka yonke uma kuqala unyaka, kunezitshudeni ezigcwala ngaphandle kwesikhungo, ziyofuna izikhala, okuyinto engafanele ngoba konke okuthinta ukubhalisela ukufunda kulesi sikhungo, kwenziwa ngezobuchwepheshe.
“Mangiqale ngicacise nje ukuthi konke okuthinta ukubhalisela ukufunda kulesi sikhungo, kwenziwa ngohlelo lwakwa-CAO, okuwuhlelo olwenziwa ngezobuchwepheshe. Kulo nyaka izitshudeni ezifake izicelo zokuzofunda kulesi sikhungo, ziwu-345 000, ngeshwa izikhala esinazo zilinganiselwa ku-9 500. Kuchaza ukuthi akuzona zonke ezizoba nenhlanhla yokuthola izikhala zokufunda.
“Njengamanje ukufakwa kwezicelo zokufunda sekuvaliwe esikhungweni, futhi kwezinye izifundo sesiqalile ukuphendula abasethubeni lokuthola izikhala zokufunda. Lezi zimpendulo zihlukene kabili, kukhona i-firm offer, okulapho isitshudeni sisuke sesisemukele khona, sekusele kuso ukuthi semukele isikhala zingakapheli izinsuku eziwu-5, ne-conditional offer, okungaba ngeyokuthi isitshudeni sinazo zonke izimfanelo zokunikwa isikhala sokufunda, kodwa mhlawumbe sisalinde imiphumela yokugcina yokuphela konyaka,” esho.
Uthi isitshudeni esingasemukelanga isikhala sokufunda, siyasuswa ohlwini lwasebenikwe izikhala, siyobekwa kwabalindile njengoba lulude uhla lwabadinga izikhala. Unxuse izitshudeni nabazali ukuthi bexwaye abantu abazofuna imali kubo ngoba bethi kunezikhala abazofakwa kuzona.
“Kazikho izikhala ezikhona ezikhokhelwa eceleni eDUT. Njengamanje uhlelo lokwemukela izitshudeni liku-80%, okusho ukuthi izifundo eziningi sezigcwele, ngeke zisemukela muntu. Kulo 20% osele, kukhona nezifundo ezifana nalezi zophiko lwakwa-Arts and Design, esezinabo abakhona, kodwa ukungena kuzo (izifundo) kudinga ukubhala izivivinyo (entry tests), izinhlolokhono (interviews) noma bahlinzeke isikhungo ngamafayela emisebenzi yabo ehambisana nezifundo abafuna ukuzenza (portfolio).
“Uma kunezikhala ezikhona, sizokwazisa abafisa ukufaka izicelo, ngendlela engadingi ukuthi kuze kufikwe mathupha esikhungweni,” kuphetha uDkt Nombela-Mseleku.
