ISouth African Weather Service isikhiphe isexwayiso esikuLevel 5 semvula enamandla ehambisana nomoya, isichotho nokuduma kwezulu okungadala izikhukhula, esifundeni iDrakensberg nasezindaweni ezisenyakatho yeKwaZulu-Natal.
Ngokusho kweSA Weather Service, le mvula ilindeleke namuhla ngoLwesithathu nakusasa ngoLwesine kanti phakathi kwezindawo ezingathinteka kubalwa uMsunduzi, i-Underberg, uMtshezi, uMtubatuba, iHluhluwe, iRichmond, uMsinga, iNewcastle, iNkandla, uNongoma, iNquthu, kwaHlabisa, iJozini nezinye.
Kukhishwe nesinye isexwayiso esikuLevel 2 semvula nomoya onamandla ohambisana nokuduma kwezulu ezindaweni ezisogwini lwesifundazwe okubalwa kuzona iTheku, KwaDukuza, eMandeni, eMkhambathini, eMthonjaneni, KwaMaphumulo, eNdwedwe, eMhlathuze, eMlalazi, eMzumbe nakwezinye.
Kuthiwa le mvula ingadala umonakalo kwingqalasizinda. UMnyango wezokuBusa ngokuBambisana nezoMdabu KwaZulu-Natal usunxuse umphakathi ukuthi uqikelele ukuphepha kwawo, ugweme nokuwela imifula eyingozi uma kuna imvula enamandla. Kunxuswa ukuba umonakalo usheshe ubikwe ukuze abadinga usizo basizakale.
