YIZE sisabalele ezinkundleni zokuxhumana isithombe sikaSne Mseleku oyindodakazi kasaziwayo, uMusa Mseleku ukuthi uzoba yikhansela le-All Natives of South Africa (ANOSA) ngaphansi kukamasipala iRay Nkonyeni, uyise uthi ayikho leyonto.
ILANGA likhulume noMusa Mseleku ngalezi zindaba othe indodakazi yakhe ayikho ezindabeni zepolitiki futhi ayisoze yaba kuzo.
“Ingamanga lento evelayo, uSne akakungenelile ukuba yikhansela. Bake bazama ukukhuluma naye bemcela ukuthi angenele esobukhansela wakunqaba lokho. Akangenele futhi akasoze alungenela ukhetho,” kusho uMseleku.
Uthe labo abasabalalisa indaba yokuthi uSne ungenele esobukhansela okwabo lokho yena njengoyise uyakuqinisekisa ukuthi yinto engekho.
Izindaba zokungenela ukhetho kukaSne zisabalale emva kokubonakala koqwembe olunesithombe sakhe kunxuswa ukuthi kuvotelwe le ntokazi egqame kuhlelo lwethelevishini Uthando Nes’thembu noLwezingane Ze’thembu kuMzansi Magic.
Inamba yocingo efakwe kulolu qwembe ithi akufonelwe kuyona kuvela ukuthi akusiyona eyakhe uSne, kodwa kuvela igama likaSiya Thango okuthiwa ungunobhala waleli qembu. ILANGA liyifonelile ibikhala kodwa ingabanjwa. Bekuze kuvele kwiTruecaller ukuthi akuyona eyalo saziwayo wethelevishini kodwa ekaThango.
Emva kokusabalala kwalolu qwembe olunoSne abantu bahlekisa ngaye ezinkundleni zokuxhumana besho izinto abazisusela ohlelweni lwabo lwethelwethelevishini.
