IZANGOMA zezulu zakwaSouth African Weather Service (Saws) sezikhiphe isexwayiso sezimvula ezinamandla ezihambisana nokuduma kwezulu ezingxenyeni eziseNingizimu-Mpumalanga yeKwaZulu-Natal.
Nakuba bese zivele ziqalile izimvula ezingxenye ezithile zesifundazwe, kusukela namuhla ngeSonto ekuseni, iSaws ithi kulindeleke ukuthi ziqine kakhulu phakathi kuka-11:00 ekuseni no-23:00 ebusuku.
Izindawo okubhekwe ukuba zintinteke kakhulu ngezingaphansi komasipala oweTheku, owaseMkhambathini, iRay Nkonyeni, Umdoni nowaseMzumbe.
Lezi zimvula zingadala izikhukhula emigwaqweni nasezindaweni eziyimijondolo. Kunxuswa abantu abahlala eduze kwemifula/imihosha nabazokuba semigwaqweni ngalesi sikhathi ukuba baqaphele, abashayelayo bashayele ngokucophelela.
