INHLANGANO uBumbano lwabaMbo, kuzothi ngoMgqibelo, luchome uphaphe lwegwalagwala izihlabani zakhona ezimbili, uNkz Zamambo Mkhize noMnu Lindelani Mkhize. Indumezulu yomcimbi, izoba seMkhondeni, ngaphandle kwaseMgungundlovu.
USihlalo woBumbano lwabaMbo, uDkt Mandla Mkhize, uthi bazobe begubha iminyaka ewu-20, le nhlangano yasungulwa. UNkz Zamambo Mkhize, waba ngowokuqala wesifazane ukuphatha umsakazo uKhozi FM ngo-1994, waphatha izikhundla eziphezulu kwaSABC njengoba ethathe umhlalaphansi ngo-2018, eyiRegional Manager, KwaZulu-Natal.
UMnu Lindelani Mkhize, yena ungomunye wabasunguli beqembu lomculo wokholo, iJoyous Celebrations.
Laba ababili baseMbo, bazohlonishwa nge’Sibiside Award”, le ndondo inikezwa abaMbo abenza umsebenzi oncomekayo, nabanamagalelo. Selokhu yasungulwa le nhlangano ikhuthaza ubumbano, ukwazisana, ukusizana nokukhuthazana kubantu baseMbo. Phakathi kwabantu aseke bathola iSibiside Award, ngoDkt Zweli Mkhize, uSolwazi Bhedlindaba VVO Mkhize (uhlanya lwaseMlambomunye), uDkt Bandile Mkhize, uNkk Nomvula Monkonyane (uMaMkhize), oyiPhini likaNobhala Jikelele we-ANC, uMjaphani Mkhize, ogqugquzela umculo kaMaskandi.
“Liya ngokukhula isasasa le migubho waseMbo. Sithi asibabonge besaphila abaMbo abenza umsebenzi oncomekayo esizweni,’ kusho uDkt. Mandla Mkhize. UKhabazela, wasungula le nhlangano nomkakhe uNkk Nomaswazi Mkhize, ongasekho. Abaholi namakhosi aseMbo, kulindeleke ukuba babekhona kulo mcimbi, wangoMgqibelo.
menzi.jele@ilanganews.co.za
