UMNYANGO wezokuBusa ngokuBambisana nezoMdabu KwaZulu-Natal usujube abezimo eziphuthumayo, ukuthi bame ngomumo njengoba kulindeleke izimvula ezinamandla nezihambisana nokuduma kwezulu, ezingxenyeni ezalukene zesifundazwe.
Izindawo ezihlonzwe njengezingakhahlamezeka kakhulu yilezi zimvula yiTheku, aBaqulusi, yiNewcastle, wuThukela, wuMlalazi, wuMhlathuze, wuLundi noNongoma.
Isitatimende esikhishwe nguMnu Senzelwe Mzila, okhulumela iCogta esifundazweni sithi: “Abantu siyabacela ukuthi bahlale ezindlini, bangabi wuvanzi ngoba lezi zimvula ziyingozi. Abahamba ngezimoto, uma imoto yalowo muntu yemuka nomfula, makehle emotweni. Ezindaweni zasemakhaya, kucelwa ukuthi imfuyo idlele eduze nasemizini yabantu,” esho.
AbakwaSouth African Weather Service bathi izimvula ezinamandla ezihambisana nokuduma kwezulu zilindelwe namuhla ngoLwesithathu, nakusasa ngoLwesine.
Akuyona yodwa iKZN ehlaselwe yizimvula ezinamandla njengoba nase-Eastern Cape, eMonti (East London), izimvula zidale omkhulu umonakalo, kanti nomfula iBuffulo ubudla izindwani.
Kukhuthazwa nabashayeli ukuthi bacophelele ngoba imigwaqo iyashelela. Kwenzeka lokhu nje, abashayeli ezweni banconyiwe ngendlela abaziphathe ngayo ngamaholidi ePhasika njengoba izingozi emigwaqeni zinciphile uma kuqhathaniswa nesikhathi esifanayo ngonyaka odlule.
menzi.jele@ilanganews.co.za
