WETHEMBISA ukukhuculula iGoli uma enqoba ukhetho uMnu Mlungisi Mabaso, i-IFP ememezele ukuthi izofolosa ngayo kwesobumeya okhethweni lohulumeni basekhaya olungomhla ka-4 kuLwezi (November).
Ethulwa ngokusemthetheni njengozomela iqembu ngoMgqibelo, uMabaso uthe leli dolobha labulekile emnothweni weNingizimu Afrika. Ubalule izinselelo zezindlu, ukwentuleka kwemisebenzi nenkohlakalo njengezinto azibeke eqhulwini kuyena.
“IGoli kumele libuyele ekubeni yidolobha abantu abaziqhenyayo ngokuhlala kulona noma eduze kwalo. INkatha izobuyisa isiko lokuphepha, ukuziphatha nokwenza izinto kahle kuhulumeni wasekhaya. Siyakholelwa ekutheni imigwaqo kumele ihlanzeke, nemiphakathi iphephe,” esho.
UMabaso ngomunye wamalungu asemancane ngokweminyaka egungqini esilawula umkhandlu waseGoli njengoba ebhekelele umnyango wezokuhlaliswa kwabantu.
