ABAKWA-TOTALSPORTS bebambisene nabakwaStillwater Sports bakhiphe isigidi samarandi esizotholwa ngumsubathi wesifazane ozokwephula irekhodi le-10km kwiTotalsports Women’s Race ezokuba seThekwini mhla ka-3 ku-August.
Irekhodi labesifazane le-10km wu-29:27 ophethwe ngu-Agnes Jebet Ngetich waseKenya, awenze ngeledlule kwi-Adidas Road eGermany. Irekhodi lomhlaba labesifazane bekuwu-30:01 obuphethwe ngu-Agnes Tirop waseKenya awenze ngo-2021 khona belu eGermany.
AbakwaStillwater Sports bahlela imijaho yeTotalsports women’s Race emadolobheni amathathu akuleli okuyiTheku, yiGoli naseCape Town, yonke ezogijinywa ngeNyanga yasesifazane u-August. Umlenze waseThekwini uzolandelwa ngoseKapa ozokuba mhla ka-9 ngeholide, bese kusongwa ngowaseGoli ozokuba mhla ka-17.
Umlenze waseThekwini yiwona okhethwe ukuthi kuzokhishwa isigidi kuwona, bathi umzila wakhona muhle futhi kunomoya wolwandle, ngakho abasubathi banamathuba amahle okwenza irekhodi kuwona.
Isikhulu esiphezulu sakwaStillwater Sports uMichael Meyer sithe sekuphele iminyaka engaphezulu kuka-20 lo mjaho ukhona. Uyakhula futhi abesifazane bayakuthokozela ukugijima bodwa.
Abafuna ukuba yingxenye yalo mjaho bangangena kwi-website ethi: www.pinkdrive.org noma kwethi: www.totalsportswomensrace.co.za.
